Roza Baqtyǵalıevanyń jasy 40-ta. 3 balanyń baqytty anasy.

Ol qansha ýaqyt ótse de 1999 jyldyń kúzin, sol bir qaraly túnniń esten ketpegendigin aıtty. Roza ol kezde A.Muhamedıuly basqarǵan Prezıdent orkestrinde fleıtada oınaıtyn.

Roza: Mınıstrdiń sol ýaqytta otbasy, bala-shaǵasy bolatyn. Balalary kishkentaı edi, qatelespesem. Biz bárimiz tórt podezden turatyn bir ǵımaratta páter jaldap turatynbyz. Bir kúni túnde A.Muhamedıuly bólmeme kirip, onymen birge qyzmettik bólmege barýǵa usynys jasady. Túsingenim, ol jaqta bazbireýler meni taǵatsyzdana kútip otyr eken. Saǵatqa qarasam, túngi tórt. Oǵan eshqaıda barmaıtynymdy aıttym. Ol qoıar da qoımaı «Júr, kıin, daıyndal!» dedi. Iyǵyma qolyn qoıdy. Qolyn qaǵyp jiberip, yzalandym. «Jaraıdy» dep esikten shyqqan mınıstr meniń shyqpasymdy túsingen soń qaıta kirip bul áreketime áli ókinetinimdi jetkizdi.Sol kúnnen bastap qýdalaýǵa tústim. Meni qalaı jumystan shyǵararyn bilmeı júrdi. Uzynqulaqtan estigenim – meniń kásibı biliktiligim nashar eken.

2000 jyldyń 10 qazanynda Muhamedıuly úrmeli orkestr mýzykanttaryna uıymdastyrǵaly jatqan konkýrs jaıly aıtady. Ereje boıynsha, mundaı is-sharanyń bolatyndyǵyn bir jeti buryn emes, eki aı buryn eskertýi tıis. 17 qazan kúni narazylyǵymyzǵa qaramastan konkýrs bastalyp ketti. Maǵan bir nota da oryndaýǵa múmkindik berilmedi. Qysqasy, aýzymdy ashtyrmady. Aldy da jumystan bosatty. Ol azdaı «jumystan óz qalaýyńmen ket» dep keńes berildi. Men bolsam úzildi-kesildi odan bas tarttym. Maqsaty – meni ketirip, ornyma óz adamyn alyp kelý. Nátıjesinde zań boıynsha meni jumystan shyǵarý úshin neshe túrli amaldar qarastyryla bastady.

Rozanyń aıtýy boıynsha, mundaı adam Mádenıet jáne sport mınıstrligin basqara almaıdy. Basqarmaýy tıis. Sebebi alǵany – para, sóılegen sózi – daqpyrt men madaqtaý, atqarǵan isi – qyzmettik basyn asyra paıdalaný. Jalpy, Muhamedıulynyń mundaı laýazymǵa taǵaıyndalýy shyǵarmashylyq ortada tań qalys, nazarylyq týǵyzdy. Taǵy bir jazyqsyz jan japa shekpesinshi dep shyndyqty aıtýdy jón sanadym. Ol qyzmetten bosatylýy, laıyqty jazasyn alýy tıis.

Prezıdent orkestrine kelsek, biz «Tapsyrys boıynsha aıtqan jerlerine baryp, óner kórsetetinbiz». Ózimizdi baryp kel-shaýyp kel sezinetinbiz. Prezıdent orkestri degen ádemi ataýy ǵana. Merekelik kostúm kıgenmen kóńil-kúıimiz merekelik emes edi. Barmaǵan jerimiz joq. «Kolgeıt – álemdegi №1 tis pastasy» degen jıynsymaq ótip jatsa, bizdiń barmaýymyz múmkin emes edi. Stomatologtar dálizde bizdi ýralap qarsy alatyn. Tek týǵan kúnderde ǵana boı kótermeppiz.  Tapsyrys berýshi stomatologtar mysaly «ózgeshe bir dúnıe» oryndap berińizder dese, orkestr tań qalǵannan bir orynda qatyp qalatyn. Mýzykanttar sebebi marshtan basqa eshteńe oınaı almaıdy. Bizden klasıkalyq týyndy, váls áýenin kútetin. Mınıstr: «Áıteýir bir nárse oınańdar!» dep buıyratyn. Mundaı jaǵdaılar jıi oryn alýshy edi.

Roza: Men muny kek qaıtarý úshin aıtyp jatqan joqpyn. Japa shekken qyzdyń jalǵyz emestigin dáleldegim keledi. Aty-jónimdi, ózime qatysty barlyq derekterdi ashyq jazyp otyrmyn. 1999-2000 jyldary kileń erkekten turatyn orkestr kollektıvinde qyzmet istegen jalǵyz áıeldi eske túsirý qıyn bolmaıdy. Bólmege kirmegenin, jumystan sebepsiz shyǵarǵanyn rastamaı kórsin...

Ótken-ketkendi umytqanym qashan. Yza-ókpege oryn joq. Sol kezde jumyssyz, úı-kúısiz qalǵanym janyma qatty batqan edi. Men tek A.Muhamedıulyn jan-jaqty tekserip shyqqanyn qalaımyn. Quqyq qorǵaý organdary bul ispen aınalyssa, neshe túrli bylyq áńgime shyǵatynyn, «qyzyqtyń kókesi» endi bastalatyndyǵyna senimdimin. Roza árbir aıtqan sózine jaýap berýge daıyn ekenin jetkizdi. Sottan da qashpaıdy. Osy málimdemesinen bas tartpaıdy.

«Eńlikke bári tartpa​ bas saldy. Ony qorqytyp, úreılendirip, qysym jasaýda. Jas qyz ózin qalaı qorǵaryn bilmeýi múmkin. Men shyndyq detektorynan (polıgraf) da málimdememdi qaıtalaýǵa daıynmyn.  Qaıtalap aıtaıyn, aıtqanym shyndyq bolǵasyn aýzymnan shyqqan ár sózge baspen jaýap bere alamyn» deıdi Roza.

Sonymen qatar Roza Baqtyǵalıeva Eńlikke quqyq qorǵaý organdary tarapynan qoldaý men qorǵaý kórsetilse dep ótinish aıtty. Sebebi qoǵam tarypynan bolsyn, jaqyndarynan bolsyn Eńlikke qazir qysym jasalýda. Mınıstrdiń nazaryna ilikken Eńlik ekeýi ǵana emes ekendigine senimdi.

Eske salaıyq, QR Mádenıet jáne sport mınıstri Arystanbek Muhamedıulyna kezinde ózi basshylyq jasaǵan oqý ornynyń túlegi Eńlik Sydyqova esimdi azamatsha «qyryndady» dep vıdeomálimdeme jasaý arqyly aıyp taqqan bolatyn.