Saıram aýdany memlekettik baǵdarlamalardy júzege asyra otyryp, mal basyn bordaqylaýdan Ońtústik Qazaqstan oblysy boıynsha aldyńǵy qatardaǵy aýdandardyń biri. Búgingi tańda, ondaǵy iri qara mal basy 176 myńnan asyp jyǵylsa, onyń 32 myńnan astamy bordaqylanýda, - dep habarlaıdy Qamshy.kz
Osylaısha, iri qarany etti baǵytta baǵyp otyrǵan saıramdyqtar búginge deıin 100 myń tonnaǵa jýyq mal etin óndirip, respýblıkanyń barlyq qalalary men kórshiles Reseı men Ózbekstannyń naryǵyna eksporttady. 

Atalǵan isti kásip kózine aınaldyryp, paıdaǵa kenelip júrgen sharýanyń biri - Zákirjan Abdýllaev. Aqsýkent aýylynyń turǵyny mal bordaqylaýdy kásipke aınaldyrǵanyna 6 jyldyń júzi boldy. Alǵashynda 5-6 iri qarany semirtýdi bastaǵan ol búginde olardyń sanyn 100-ge jetkizdi.

3 aı buryn «Maksımým» aımaqtyq-ınvestısıalyq ortalyǵynan jyldyq 7 paıyzben 15 mln. teńge nesıe alyp, kásibin jandandyrǵan JK «Abdýllaev» eńbek ujymynyń aýdandyq kásipkerlerge qyzmet kórsetý ortalyǵyna aıtar alǵysy mol. 

Kásipkerler palatasy aýdandyq fılıalynyń konsýltant-menedjeri Q.Asylbolatov «Maksımým» AIO-nan az mólsherdegi paıyzben nesıe alýyna qujattaryn rásimdeýge zań aıasynda qyzmet kórsetip, jón siltegen eken. 

– Negizinen, tis dárigeri mamanymyn. Mamandyǵym boıynsha 1 jyldaı jumys atqardym. Bul kásipti aǵalarymnan úırendim. Otbasymyzdyń bul kásippen aınalysyp júrgenine 15 jyldan asty. Osy salada jetistikke jetetinime kózim jetip, jeke aınalysýdy jón kórdim, - deıdi 29 jastaǵy kásipker.

Onyń Aqsýkentte jeke mal soıatyn orny bar. Kúnine 2-2,5 tonnaǵa deıin mal bordaqylap, etin Almatyǵa jóneltedi eken. Osylaısha, janyna jaqyn kásipti tabys kózine aınaldyrǵan sharýa ózine ǵana emes, aınalasyndaǵy 8 adamdy jumyspen qamtýǵa septigin tıgizip otyr.