«Qazkontent» AQ basshysy bolyp Shyńǵys Sharapıev taǵaıyndaldy, - dep habarlaıdy Qamshy.kz.

Bul týraly Aqparat jáne komýnıkasıa mınıstri Dáýren Abaev Feısbýktegi paraqshasynda jazdy.

«Búginde elimizdiń aqparattyq naryǵynda úlken ózgerister bolyp jatyr. Internet ákelgen múmkindikter otandyq medıa salanyń bilgirlerin únemi tyńnan jol izdep, jańa formattar tabýǵa bastaýda. Aýdıtorıanyń nazaryn aýdarý úshin, sonymen birge sapaly kontent jasaýǵa múmkindik beretin resýrstar úshin tartysty báseke júrýde.

Moıyndaý kerek, memlekettik BAQ-tardyń osy jańa talaptarǵa beıimdelýi ártúrli deńgeıde. Bul rette olarǵa basqa áriptesterine qaraǵanda aıtarlyqtaı jaǵdaı jasalyp otyrǵany belgili. Bul problemalardy jaqsy bilemiz.
Sondyqtan, biz kúrdeli ózgertýler jasaýǵa daıynbyz. Osyǵan oraı, memlekettik BAQ-tardyń árbiriniń aldynda naqty maqsaty kórsetkishter qoıylyp otyr. Olar soǵan qol jetkizýge mindetti.
Sonyń ishinde aqparattyq, mádenıet jáne bilim berý baǵattaryndaǵy birneshe ınternet-resýrsty qanatynyń astyna alǵan «Qazkontent» AQ-nyń jumysyna aıryqsha kóńil bólinýde.

Medıa qurylym qyzmetiniń negizinde memleket basa nazar aýdaryp otyrǵan aǵartýshylyq mısıasy jatyr. Bul jerde damý reıtıńi kontenttiń sanymen emes, sapasymen ólshenýi tıis. 

Jaqynda biz otandyq tarıhqa arnalǵan http://e-history.kz/kz saıty bazasynda jańartylǵan National Digital History ınternet-portalyn tanystyrdyq. Meniń oıymsha, biregeı materıaldarǵa toly, óte sapaly mýltımedıalyq resýrs daıyndaldy.
Qazirgi ýaqytta biz elimizdiń jas aqyn-jazýshylaryna qoldaýdy kúsheıtý nıetimen adebiportal.kz portalyn jańǵyrtýǵa kúsh salyp jatyrmyz.
Basqa saıttarda da túbegeıli ózgerister bolmaqshy. Bul týraly aldaǵy ýaqytta jeke toqtalyp ótemiz.

Al ázirshe keshe «Qazkontent» AQ-nyń jańa basshysy bolyp Shyńǵys Sharapıevtiń taǵaıyndalǵany týraly aqparatpen bóliskendi jón kórip otyrmyn. Kópshiligińizdiń ony biliktiligi joǵary, qolynan is keletin maman retinde tanıtyndaryńyzǵa kúmánim joq. Shyńǵysqa jáne kompanıa ujymyna tabys tileımin» dep jazdy mınıstr.