Aýyl sharýashylyǵyn damytý Qazaqstan úshin óte mańyzdy. «Altyn, kúmis tas eken, arpa,bıdaı as eken» demekshi, azyq tutynatyn adam qashanda aýyl sharýashylyǵy ónimderine muqtajdyq tanytyp jatady. Altyn, kúmissiz shydaýǵa bolady, al, tamaqsyz uzaq shydaý múmkin emes. Osy maqsatta Qazaqstanda aýyl sharýashylyǵyn damytýǵa arnalǵan «Agrobıznes 2020» baǵdarlamasy aıasynda Ońtústik óńiri orasan zor jetistikke jetti.
Sársenbiniń sátti kúninde óńir basshysy B.Atamqulov oblystyq depýttarmen esepti kezdesý ótkizdi. Onda oblys ákimi óńirde İ jartyjyldyqtyń qorytyndysymen aýyl sharýashylyǵynyń ónim kólemi 123 mlrd. teńgeni qurap, 2 paıyzǵa artqanyn aıtty. Al egis kólemi ótken jyldan 13 myń gektarǵa artyp, 788 myń gektardy quraǵan. Bul ótken jylǵa qaraǵanda áldeqaıda kóp. Osydan óńirimizde jyldan-jylǵa aýyl sharýashylyǵy asa kóp mán berip kele jatqanyn kórýge bolady.
Esepti kezdesýde málim bolǵandaı agrarly aımaqtyń sharýalary osy jyly dándik júgeriden 108,4 myń tonna, kókónisten 811 myń tonna, baqshadan 1 252 myń tonna, kartoptan 195 myń tonna, masaqty daqyldardan 470 myń tonna ónim jınaǵan. Sondaı-aq, oblysta alǵash ret bıdaıdyń ortasha ónimdiligi 22 sentnerdi qurap, rekordtyq ónim alynyp otyr.
Jıynda aımaq basshysy tamshylatyp sýǵarý ádisi qosymsha alty myńǵa jýyq gektarǵa endirilip, jalpy kólemi 49,7 myń gektarǵa, al jylyjaılar qosymsha 72 gektarǵa salynyp, jalpy 1 098 gektarǵa jetkenin aıtty. Aıta keteıik, jalpy elimiz boıynsha jylyjaılardyń 87% Ońtústik úlesinde. Osy jylyjaılardan 80 myń tonna kókónis ónimderi jınaldy.
