Ońtústikte maqta terý naýqany qyza bastady. Osy naýqan kezinde Maqtaral aýdanynda maqtashylardyń dástúrli semınar-keńesi ótti. Onda naýqan kezinde aq altyndy shashpaı-tókpeı, jınap alý joldary men ozyq tehnologıany jumyldyrý máseleleri talqylandy. Sondaı-aq, maqta sharýashylyǵyndaǵy túıtkildi máseleler de ortaǵa salyndy.
Jalpy elimizde «aq altyndy» egetin birden-bir oblys sanalatyn Ońtústik Qazaqstanda maqtashylarǵa memleket tarapynan kóptegen jeńildikter berilip jatyr. «Agrobıznes 2020» jáne basqa da baǵdarlamalar aıasynda sharýalarǵa sýbsıdıa tólendi. Uzaq merzimge lızıń arqyly tehnıka, paıyzy tómen nesıe berildi.
Osy semınarǵa qatysqan oblystyq aýyl sharýashylyǵy basqarmasy basshylarynyń aıtýynsha, aldaǵy ýaqytta jeńildetilgen nesıeniń kólemin 18 mıllıon teńgege jetkizý, merzimin bes jyldan jeti jylǵa uzartý qarastyrylyp jatyr. Gektarly sýbsıdıany qalpyna keltirý de josparda bar. Ulttyq qordan qarjy qaralsa, 15 qarashadan bastap atalǵan sýbsıdıa maqta, júgeri, kúrish ósirýshilerge tólenýi tıis.
Qazaq maqta sharýashylyǵy ǵylymı-zertteý ınstıtýty maqtanyń jańa tuqym sorttaryn shyǵarýda. Onyń sapasy Qytaı, Túrkıadan ákelingen shıtten artyq bolmasa, kem emes.Maqtaly aımaqta aýyl sharýashylyǵyn ár taraptandyrý baǵytynda bıyl aýqymdy ister atqaryldy. Endigi jıyn-terimde ónimdi rásýa etpeý qol kúshine baılanysty bolmaq. Sharýanyń kez-kelgeninde tehnıka joq. Kombaın az. Egilgen maqta shıtinen joǵary ónim alý ózektiligi basqosýdyń basty taqyrybyna aınaldy. Bıyl aýdandaǵy maqtanyń 65 paıyzy kombaınmen jınalady degen jospar bar.
Dıhandar jyl saıyn maqtalyq alqaptyń kólemin barynsha azaıtyp, ónimdilikti joǵarylatýǵa kúsh salyp jatyr. Ǵylymı ortalyqtardyń tujyrymyna súıenip, qurǵaqshylyqqa shydamdy ári ónimdiligi joǵary maqta sorttaryn egýde.
