«Jumyspen qamtý 2020» jol kartasy aıasynda 5 óńirde pılottyq rejımde «Aýylda jumyspen qamtý» atty jańa jobany iske asyrý qolǵa alyndy. Oǵan 10 mıllıard teńge bólingen. Bul qarjy aýyldardaǵy jańa kásiporyndardy qoldaýǵa jáne oǵan mamandar tartýǵa jumsalady. Jáne aýylda jumyssyz júrgen jandarǵa jumys taýyp berýge nazar aýdarylady. Osy arqyly el ekonomıkasyn kóterýge bolady. Ekonomıkasy damyǵan el álemdik naryqta ózge eldermen taıtalasa alady.
Memleket basshysynyń tapsyrmalaryn júzege asyrýǵa baǵyttalǵan is-sharalar jospary ońtústikte de qarqyndy túrde júzege asyrylýda. Mysaly, "Agrobıznes 2020" baǵdarlamasy aıasynda Otyrar aýdanynyń Maıaqum, Baltakól aýyl okrýgterindegi «Otyrar-Sút-Et» selolyq tutyný kooperatıviniń quramyna jergilikti «Serikbaı-B», «Meıirbek LTD», «Úsenov-N» jaýapkershiligi shekteýli seriktestikter kiredi. Bul seriktestikter birige otyryp, aýqymda jobalardy iske asyrýda. Kooperatıv bıyl 190 gektar alqapqa «Jıenbaı» sortty qaýyn, 130 gektaryna jońyshqa, 100 gektaryna júgeri daqyldaryn ekken. Bul daqyldar naryqta joǵary suranysqa ıe. Jańa tehnologıalardy paıdalaný arqyly mol ónimge qol jetkizgen sharýashylyqtyń ónimderine suranys joǵary. Aýdan ákimdiginiń baspasóz qyzmeti habarlaǵandaı, búginde Reseıdiń Máskeý, Sankt-Peterbýrg qalalarynan kelgen kásipkerler ózderi tasymaldap áketýde eken. Al, Baltakóldegi dıqandar ǵylymǵa negizdelgen, sońǵy ozyq tehnologıalardy paıdalanyp 104 gektar alqapqa tamshylatyp sýarý ádisimen pıaz egipti. Dıqandar ár gektarynan 60 tonnadan ónim alýda. Bul ónimder kelisim-shart boıynsha «Otyrar qoıma» JSHS-niń qoımasynda saqtalmaq. Sonymen qatar, 50 gektar alqapqa tamshylatyp sýarý ádisimen kúzdik pıaz egilip bitken.
Dál qazir ońtústik aýdandarynda osyndaı tirlikter atqarylýda. Kúzgi jıyn-terimde mol ónim alý josparlanyp otyr.
