«Qazaq úni» gazetinde jarıalanǵan maqalasynda aqyn Mádenıet jáne sport mınıstri Arystanbek Muhamedıulynyń atyna aıtylǵan aıyptaýlardy qazaqqa jat qylyq dep baǵalaǵan, - dep habarlaıdy Qamshy.kz.
Biz Egemen elimizdiń 25 jyldyǵynda bıik belesterdi baǵyndyryp kelemiz, Elbasymyzdyń sarabdal saıasatynyń arqasynda qaryshty qadamdar jasap jatyrmyz, el eńsesi tiktelip, ekonomıkamyz da, mádenıetimiz de ilgeri damyp, el sanasatyn dárejege jettik. Allaǵa shúkir! Osyndaı jetistikterimizdiń arqasynda qazaq halqyn álem tanyp otyr. Aldymyzda EKSPO kele jatyr, bul da zor jetistigimizdiń biregeıi dep bilemin.
Ókinishke oraı, búgingi qoǵamda keleńsiz oqıǵalar da jıi oryn alyp jatyr. Keshegi kúngi Mádenıet jáne sport mınıstrine qatysty alyp-qashpa áńgimeni taratý óz basym qylmys dep bilemin! Osyny uıymdastyryp otyrǵandardyń ózderin kináli dep taný kerek.
Birinshiden, kez kelgen adamdy bes-alty jyldan keıin aıyptaý – azamattyq quqyqty buzý degen sóz. Bireýdiń atymen bireýge qıanat jasaıtyn azamattar zań boıynsha jazaǵa tartylýǵa tıis dep oılaımyn. Ekinshiden, munyń artynda turǵan birqatar azamattar bar eken. Qoǵamda ol týraly áńgime bar. Muny qyzdyń jalǵyz óziniń áreketi degenge kúdiktenemin. Keıingi kezde, bireýdi qaralap, kúıe jaǵatyndar qatarynda birqatar adamdardyń turǵany uıatty jaǵdaı. Jalpy, bizdiń mádenıetke, saltymyzǵa, dástúrimizge jatpaıtyn, jat qylyq bul. Ókinishke oraı, sońǵy kezderi úlkendi syılamaý, kisini qadirlemeý beleń alyp barady. Tipti, ar-uıattan attap, namystan bezip baramyz…
Bunyń ar jaǵynda basqa bir másele tur, kim aıtsa da. Qazaqtyń azamattary, er azamattary usaq-túıek sharýamen aınalyspaýy kerek, ári-beriden soń. Bireýdiń qoltyǵyna sý búrkip… Eldi dúrliktirýdiń qajeti qansha? Basqa da sharýalar jetip jatyr ǵoı… Bul endi uıat emes pe?
Mynaý – qazaqtyń azamatynyń, qazaqtyń qyzynyń sharýasy emes. Muny azamattarymyzdyń usaqtalǵanynyń, qyzdarymyzdyń kórgensizdikke boı aldyrǵanynyń belgisi dep uǵamyn.
Azamatqa jala jabý – uıat! Sondyqtan, zań jóninen kelse de, adamgershilik jóninen kelse de, mynadaı azamatty muqatý úshin, ony basqa bir maqsattarmen aıaǵynan súrindirý úshin eldikke, tipti qazaqqa, kisilikke jaraspaıtyn áreketke barý – QAZAQTYŃ QYZDARYNA UIAT NÁRSE! OSYNY QOSTAP JATQAN AZAMATTARDYŃ TULǴASYNA, KİSİLİGİNE UIAT NÁRSE!
Men bul qyz bala qoǵam aldynda óziniń osy is-áreketi úshin uıalyp, keshirim suraýy tıis dep oılaımyn.
Bárimiz de adambyz, bárimiz de azamatpyz. Sondyqtan, Arystanbektiń syrtynan aıtylyp jatqan sózder shyndyqqa janaspaıdy.
Óz basym Arystanbekti jastaıynan bilemin. Óz salasynyń sheberi. Belgili qoǵam qaıratkeri. Elbasymyzdyń tapsyrmalaryn jaýapkershilikpen oryndap kele jatqan azamat. Ol mınıstrlikke kelgeli beri qanshama isti aıanbaı atqaryp, iskerligin dáleldep keledi.
Arystanbek – mádenıettiń, ónerdiń salasymen bite qaınasyp, sol úshin jaralǵan adam.
Nesipbek AITULY,
aqyn, Memlekettik syılyqtyń laýreaty
