Tamara Asar jańa beınebaıanyn jaryqqa shyǵardy,-dep habarlaıdy Qamshy.kz Stan.kz-ke silteme jasap.  Ánshi 20 jyldan beri armandap kele jatqan dúnıesine qol jetkizgenin aıtyp, kózine jas aldy. 

Osydan birneshe aı buryn Tamara qýanyshty jańalyǵymen bólisetinin aıtqan edi. Ánshi ýáde etken sózinde turdy. Ol 20 jyl boıy armandaǵan armanyna qol jetkizgenin aıtty.

«Muny bóle jaryp, ózgeshe jańalyq qylyp aıtatynyń sebebi bar. Osydan 20 jylǵa jýyq ýaqyt buryn basymnan úlken qıyndyqtar ótken bolatyn. Ondaı kezde balasy úshin áke-sheshe ne isteı alady? Duǵa jasap, Alladan balasyna densaýlyq suraı alady. Sol kezde ákem kóp adamǵa tireý bolǵan, súıeý bolǵan Beket ata degen árýaqty jerge baryp, Qudaıǵa jalbarynyp, sadaqasyn bergen eken. Ol kezde men júrmeımin, meni zembilmen alyp júrdi. Esimde qalǵany – qasymnan adamdar ótip: «qandaı jap-jas ádemi qyz, ómiri osymen aıaqtalatyn shyǵar», – dep aıtatyn. Kózimnen jas móltildep, «Alladan jarlyq kelse ana taýdyń bıigine shyǵyp, án aıtamyn» deıtinmin. Sol armanym oryndaldy», – dedi ánshi 31 arnanyń «Aıta bersin» baǵdarlamasyna bergen suhbatynda.

Aıta keteıik, Tamara Asar osydan 20 jyl buryn jol apatyna ushyrap, bir aıaǵynan aıyrylyp qalǵan bolatyn. Sodan bastap ol Mańǵystaý óńirindegi Bozjıra shyńyna shyǵyp, án aıtýdy armandaǵan eken. Búginde jańa beınebaıanyn asqaq armanyna arnaǵan ánshi Allaǵa alǵys aıtýmen keledi.

«Bireýge ol bolmashy nárse ǵana shyǵar, biraq maǵan ol – úlken armannyń oryndalǵany. Bireýge kúndelikti kúıbeń tirlikte bireýdiń sóz aıtyp, bireýdiń kúıeýge shyqqany jańalyq shyǵar, maǵan 20 jyldyq armanymnyń oryndalǵany – jańalyq. Bireýge án aıtý ánsheıin erikkenniń ermegi shyǵar, biraq maǵan ol Qudaımen tildeskenmen birdeı», – dep jalǵady sózin Asar.

Aıtpaqshy, Tamaranyń aıtýynsha, Bozjıra shyńynyń erekshe qasıeti bar kórinedi. Armany oryndalǵan jannyń kózine ol jerde arqar kórinedi eken.

«Halyq ishindegi bir ańyz bar. Sol jerdiń bir kúshi bar. Eger sizdiń armanyńyz oryndalsa, kózińizge arqar kórinedi. Ony qasyńyzdaǵy adam kórmeýi múmkin. Men sol arqardy kórdim. Allaǵa shúkir baqyttymyn», – dep túıindedi sózin ol.