Toqtar Tóleshov Atyraýda ótip jatqan Maks Boqaev pen Talǵat Aıanǵa qatysty sot otyrysynda jaýap berdi, - dep habarlaıdy Qamshy.kz Tengrinews.kz – ke silteme jasap.

Prokýrorlar Toqtar Tóleshovten Astanadaǵy ýaqytsha ustaý ızolátoryndaǵy vıdeo arqyly jaýap aldy. Aıta keteıik, kásipkerdiń bergen jaýaptary Facebook jelisinde kórsetildi.

Toqtar Tóleshovtiń aıtýynsha, ol Maks Boqaevpen de, Talǵat Aıanmen de tanys bolmaǵan. Kásipker aqshalardy Talǵat Aıanǵa bireý arqyly bergen.

"Men ınternetten jer reformasy týraly keıbir málimetterdi aldym. Barlyq materıaldy konvertke salyp, Nurǵalıǵa "Volkovtan 150 myń dollar alyp, onyń 100 myńyn jiber, al 50 myń teńge ózinde qalsyn. Qalǵanyn sosyn aıtam" dedim. Nurǵalı ol aqshalardyń kimge jiberilip jatqanyn, ol qandaı maqsatta jáne ne úshin ekenin debilmedi. Sodan Jańa jyldan soń Nurǵalı maǵan keldi. Aqshanyń alýshyǵa jetkizilgenin aıtty", - dedi Tóleshov.

"Jer máselesi. Sebebi, qazaqtar óz jerleri úshin sońyna deıin barady. Jer máselesine qatysty halyq arasyndaǵy shý men olardyń narazylyǵy... Bul kez kelgen qazaq úshin janǵa tıetin másele. Sondyqtan da men osy máseleni qozǵaýdy jón kórdim. Jáne maǵan da sheteldikterdiń bizdiń jerimizdi alatyny jaıly áńgimeler qatty unamady. Men qazir de jerimizdiń sheteldikterdiki bolýyn qalamaımyn", - dep jaýap berdi kásipker prokýrordyń qoıǵan suraqtaryna.

Sonymen qatar, Tóleshov óziniń vıse-prezıdent bolǵysy kelgendikten osy mıtıńti qarjylandyrǵanyn moıyndady.

"Bul meniń bedelimdi kóterý úshin jasaldy. Bul mıtıń meniń qoǵam qaıratkeri, Qazaqstandaǵy tanymal adamdardyń biri bolýym úshin kerek boldy. Al basqa jaǵynan alyp qaraıtyn bolsaq, bul meniń azamattyq pozısıam, ıaǵnı men jerdiń sheteldikterge satylýyn qalamaımyn. Eger de qazir elimizde vıse-prezıdent degen qyzmet engiziletin bolsa, meniń kandıdatýram qaralatyn edi. Men vıse-prezıdent bolýǵa umtyldym. Qazir endi bilmeımin, biraq sol ýaqytta men vıse-prezıdent bolýdy qaladym", - dedi kásipker.

Eske salaıyq, 24 sáýirde jer máselesi boıynsha mıtıńke Maks pen Talǵatpen qatar myńdaǵan adam shyqqan bolatyn. Alaıda qala ákimdigi mıtıń ótkizýge resmı túrde tyıym salǵan edi. Keıin - 18 mamyrda Maks pen Talǵat, olardyń birneshe jaqtaýshysy zańsyz mıtıńke qatysýǵa shaqyrdy dep qamaýǵa alynǵan bolatyn. 24 mamyrda Aıan men Boqaevqa qatysty sotaldy tergeýdiń bastalǵany belgili boldy.  

Al 3 maýsymda Atyraý qalalyq №2 soty Maks pen Talǵatqa qatysty eki aıǵa qamaýǵa alý túrindegi bultartpaý sharasyn tańdaǵan bolatyn.