Jambyl aýdanyna mal satýǵa baryp, artynsha múrdeleri tabylǵan Uzynaǵashtaǵy úsh aǵaıyndyny urlanǵan myltyqpen atyp óltirgen, - dep habarlaıdy Qamshy.kz QazAqparatqa silteme jasap. 

Myltyqty ıesi 2 aı buryn joǵaltqan. Bul jóninde Almaty oblysy prokýratýrasy birinshi basqarmasynyń aǵa prokýrory Álibek Myrzabekov málim etti. 

Qazirgi tańda Almaty oblysynda qarý-jaraq tonaý faktileri jıilep ketken. 200-den astam qarý-jaraq urlanǵan qarý tiziminde tur. Oblystyq prokýratýra qyzmetkerleriniń aıtýynsha, olardyń eshqaısysy tabylmaǵan. 
Negizinen qarýdy jeke turǵyn úılerden keıde seıfterimen qosa qoldy qylady. Urlanǵan qarý tek qylmys jasalǵanda ǵana áshkerelenip jatady. Qazirgi tańda Almaty oblysy turǵyndarynyń qolynda 24 myń birlik qarý resmı tirkeýde tur. 

Almaty oblystyq prokýratýrasy birinshi basqarmasynyń aǵa prokýrorynyń aıtýynsha, kez-kelgen azamat oblys arasynda kóship-qonǵan jaǵdaıda turǵylyqty jeri boıynsha ishki ister organdaryna baryp, qarýyn tirketýi tıis. Sondaı-aq kúzet agenttikterimen arnaıy kelisim shartqa otyrý kerek. Sol kezde joǵalǵan qarýdy jyldam anyqtaýǵa múmkindik týady.