2016 jyldyń 21 qazanynda, saǵat 10.00-de Qazaqstan Respýblıkasy Memlekettik ortalyq mýzeıi «Janashyr» Halyqaralyq qaıyrymdylyq qoǵamdyq qorymen birlesip, Almaty qalasy İshki saıasat basqarmasynyń memlekettik áleýmettik tapsyrysy boıynsha uıymdastyrǵan «SHAǴYN EKSPO-2016» atty ınovasıalyq jobalar baıqaýynyń kórmesi ashylady.
Baıqaý maqsaty - Almaty qalasynyń turǵyndaryn «Ekspo-2017» kórmesine shyǵarmashylyqpen belsene qatysýǵa shaqyrý, azamattardyń ınovasıalyq ıdeıalaryn qoldaý jáne yntalandyrý. Sondaı-aq, «EKSPO-2017» kórmesine jergilikti óńirlerdi nasıhattaý jáne aımaq turǵyndary esebinen qatysýshylar sanyn arttyrý bolyp tabylady.
2012 jyldyń 22 qarashasynda Parıj qalasynda ótken EXPO Halyqaralyq kórme búrosy Bas assambleıasynyń 152-nshi sesıasy sheshimimen kezekti «Ekspo-2017» halyqaralyq kórmesi Astana qalasynda ótkiziletindigi jarıalanǵandyǵy málim.
Qazaqstanda alǵash ret ótkizilip otyrǵan EXPO búkilálemdik kórmesi – mańyzy jaǵynan dúnıejúzilik ekonomıkalyq forýmdarmen, al týrısik tartymdylyǵy boıynsha eń tanymal álemdik deńgeıdegi sporttyq jarystarmen salystyrýǵa turarlyq aýqymdy oqıǵa. Osyǵan sáıkes, halyqty jumyldyrý, bir kisideı at salysý maqsatynda mýzeı qabyrǵasynda uıymdastyrylyp otyrǵan «SHAǴYN EKSPO-2016» kórmesi Elordamyz Astanada ótetin búkilálemdik sharaǵa óz úlesin qospaq.
«EKSPO-2017» kórmesiniń negizgi ıdeıasy jańa energıa kózderin izdestirý, qoldaný bolǵandyqtan, atalmysh «SHAǴYN EKSPO-2016» ınovasıalyq ıdeıalar kórme-baıqaýynyń negizgi taqyryby da úzdik jas ónertapqyshtardyń ónertabystary, jańa tehnologıalar jetistikteriniń baıqaýy bolyp tabylady.
Kórmege Almaty qalasyndaǵy 40-tan astam ónertapqyshtyń jobalary qoıylady.
Atalǵan baıqaý qatysýshylary «Eń úzdik ónertabys»; «Eń úzdik ónertapqysh áıel»; «Eń jas ónertapqysh»; «Jas daryn»; «Eń belsendi ónertapqysh» degen atalymdar boıynsha baǵaly syılyqtarmen jáne dıplomdarmen marapattalady.
Úzdik shyqqan ıdeıalar men ónimder Astanada ótetin «Ekspo-2017» kórmesine joldama alady.
