2016 jylǵy 17 qazanda Din isteri jáne azamattyq qoǵam mınıstri Nurlan Ermekbaev Astana qalasynyń ákimdigi «Rýhanı kelisim kongresi» halyqaralyq qorymen birlesip uıymdastyrǵan «Etnıkaaralyq kelisim – dinı turaqtylyqtyń negizi» taqyrybyna arnalǵan halyqaralyq konferensıa jumysyna qatysty, - dep habarlaıdy Qamshy.kz.

Konferensıa Rýhanı kelisim kúni jáne Qazaqstan Respýblıkasy Táýelsizdiginiń 25-jyldyǵyna oraılastyryldy.

N.Ermekbaev óziniń quttyqtaý sózinde halyqaralyq keńistikte, sondaı-aq memleket ishinde, mádenıetter men dinder arasynda suhbat ornatýǵa, úılesimdi etnıkaaralyq jáne konfesıaaralyq qatynastardy damytýǵa baǵyttalǵan Memleket basshysynyń birinshi halyqaralyq bastamalarynyń biriniń dúnıege kelgen kúni retinde elimizdiń tarıhyna kiretinin eskere otyryp, konferensıa qatysýshylaryn kele jatqan Qazaqstan halqynyń Rýhanı kelisim kúnimen quttyqtady.

«Qazaqstan zaıyrly memlekettiń negizgi prınsıpi retinde – dinı, ulttyq jáne násildik qatystylyǵyna qaramastan barlyq azamattardyń teńdigin jarıalady. Eshkim basqa azamatty onyń ulttyq, dinı qatystylyǵyna nemese dinı seniminen bastartýy negizinde kináláýǵa quqyǵy joq. Osynyń arqasynda Qazaqstanda etnostar men konfesıalar arasynda dostyq qatynastar ornady, ártúrli mádenıet adamdary arasynda senim men kelisim, bir-birine degen syılastyq árqashanda bizdiń qoǵamymyzdyń mańyzdy qundylyqtarymyz bolyp tabylady», - dedi Ermekbaev.

Konferensıa jumysyna Qazaqstan halyq Assambleıasynyń Tóraǵasy E.Toǵjanov, Astana qalasy ákiminiń orynbasary E.Amanshaev, «Rýhanı kelisim kongresi» halyqaralyq qorynyń tóraǵasy T.Muhamedjanov, RF Memlekettik Dýmasynyń depýtaty I.Kobzon, sonymen qatar dinı birlestikterdiń, ǵylymı-sarapshylar qaýymdastyǵynyń, Reseı, Qyrǵyzstan, Lıvan jáne AQSH memleketteriniń úkimettik emes uıymdarynyń ókilderi qatysty.