Meni izdep keldiń sen Boıyńda mahabbat alaýlap, Janyńda jas arman san aýnap. Sen keldiń arqańa qondyryp Men týǵan hajaıyp ǵalamdy ap.   Jettiń sen dýmandy Sol aýyl keshinen, Topyraq ýystap týǵan jer tósinen. Sen keldiń botadaı bozdaǵan shaǵymda, Tumandy kúnderi adasqan kóshinen.   Jupar lep ańqıdy balǵyn jas deneńnen, Ol ıis- el ısi, jer ısi. senem men. Quıamyn kókirek tusynan keýdeme, Ómirim óshkenshe órtenip óbem men.   Kóktedi jadymda dúnıe jańaryp, Ótken bir elester qaıtadan oralyp. Mendegi saǵynysh sekildi sarǵaıǵan Japyraq jamalyn jatamyn oranyp.  

Qara nardyń órkeshindeı bul taýdan, Kúmis múıiz arqar aýǵan, bult aýǵan... Torańǵy men tobylǵylar búrlegen, Arqarlardyń jasymenen bir tamǵan.   Meken izdeý- ol qandaǵy tektilik, Qý medán qula túzge bet buryp. Qońyr qulja tartty úıiri dúrkirep, Seki tastyń seńgirinde kóp turyp.   Arqar aýdy, arqa jeli yzǵyryq, Syrqyratty súıekterdi kúzde ulyp. Tartty qulja armanynyń tusaýyn, Kúreńbeldiń kódesine úzdirip.   Tuıaqtaryn tomar qaqty, tas qaqty, Janarlaryn móldir-móldir jas japty. Taptydaǵy tartty aldyǵa seriler, Ǵasyrlardan qalǵan kóne soqpaqty...   Tamyrynda qaınaǵan qan - toly aǵyn, Qımastyqtyń qıqym etip jolaǵyn. Dúrkiregen arqarlardyń ishinde, Ózim ketip bara atqandaı bolamyn!  

Súıip edim ne taptym? Súıkimimdi ketirdim. Kúıip edim ne taptym? Kúıik tartyp otyrmyn.   Qaraı berip ne taptym? Kóz jylady qaryǵyp. Saǵynǵannan ne taptyp? Saban boldym zaryǵyp.   Jolyǵyp em ne taptym? Jolda júrmin seriksiz. Ańsap edim ne taptym? Ańyradym eriksiz.   İzdegennen ne taptym? İz kórsetpes epti ǵoı. Qumartqannan ne taptym? Qolǵa qonbaı ketti ǵoı.   Shúıligip eń qyransha, Ańǵa tústiń jańylyp. Jantaı endi júregim, Aıdyń nuryn jamylyp.    

Aq ulpa qanat aq torǵaı Sen de bir jetim qus ediń, Men de bir jetim ul boldym... Basyna júrgen baq qonbaı.   Aspanyń seniń tumandy, Erteńim meniń kúmándi. Saltanatymdy muń aldy, «samarqanymdy sý aldy».   Kónem de qaıtem kónem de! Aınala ushtiń tóbemde, Erkelik ketti senen de, Erkindik ketti menen de.   Qona almaı júrsiń, qaıteıin Aınalyp asha butaqqa. Qona almaı júrmin, qaıteıin Qonysym quryp, jutap ta.   Tańdaıyńnan bal tambaı, Qaıǵydan qara qan tamǵan. Arqardaı aýǵam, ótkende Arqanyń jeli arqamnan.   Men saǵan qamqor bolaıyn, Sen maǵan súıeý bol janym. Bizderge basqa, osynaý Panıde pana joq janym.  

Kóńilimnen óshire almaı eski izdi, Attandyrdym qusqa baılap kóp kúzdi. Kók bóriniń úni me eken qarlyǵyp, Bula daýys býlyqqan sher jetti izgi.   Shýaǵyna jerik bolyp joq nurdyń, Jesir kúnniń jelkesinde kóp turdym. Ózim erte arýlaǵan baqyttyń, Qabirine quran oqyp kep turmyn.   Saıqal tirlik saıasynda qalǵydym, Men ańsadym arý kóktem jańbyryn. Jalǵan kúnge ýáj aıtyp jatady, Shyndyqtary kebindelgen taǵdyrym.   Aqyn muńy deýshi edi ǵoı seri muń, Aıta-aıta seri muńnan jeridim. Sulýlyqqa qushtar bolǵan kóńilim, Basylarma seniń ǵazez jerigiń?!   Balǵyn ǵashyq súıengen bala talǵa, Nilin quıyp aq gúldiń alaqanǵa. Baǵzy kúnim basyn qaıta burardaı, Alataýǵa qaraımyn ala tańda. *  *  * Qyzyqpaıtyn qyz unatar altynǵa, Shalqy kóńil shalqaryńa sharq urda. Tabanymnyń taby tússin nar qumǵa, Janarymda jaıdiń oty jarqylda.   Kóktem kelse kókoraıly túlep qyr, Meniń janym sulýlyqty tilep tur. Qara tasqa jabysa ósken qynaǵa, ǵashyq bolǵan júrek bul. Qyzyqtyrmas qyzyǵy joq qýys baq, Gúlden shyryn jınaǵanmyn ýystap. Sher kóńildiń sherin shertip jatamyn, Jumyr jerdiń júregimen tynystap.   Qyran úni- salǵan ánim degenim, Bıik-arman, bıik ushsam dep edim. Dúnıeniń dúbirimen dúrligip, Dur batyrdyń sońyna erip kelemin. Kókeıimde shyrqalmaǵan bir án júr, Kóz aldymda kólbeńdeıdi bulań nur. Aıǵaı ,kóńil, qyzǵaldaq bop kóktersiń, Jatqanymen qyraý qyr.

Júregimdi ýlaǵan joq qunsyz muń, Muńym meniń jalǵan bolsa...qunsyzbyn. Tabıǵattyń sýretkeri edim men, Ár kóńilge keledi ylǵı kún syzǵym.   Saıtan dúnıe sezimimdi jıi urlap, Ún boıymdy shaqqylaıdy búıi baq. Júrekterge jahut shashqym keledi, Kókiregime kún jaýharyn quıyp ap.   Bóri babam jortqan dóńde ulydym, Zahar túnniń zárin jutyp sýydym. Sholpan týar shaqty ańsadym, jamylyp Jyrtyq qostyń jurtta qalǵan julyǵyn.   ... Tabıǵattyń sýretkeri edim men, Ár kóńilge keledi ylǵı kún syzǵym.