Qazaqstannyń prokýrorlary men tergeýshileri shetelde qalaı jumys isteý kerektigin de bilmeıdi. Bul týraly búgin «Qarjylyq tergep-tekserýdiń jáne urlanǵan aktıvterdi shetelden qaıtarýdyń ulttyq júıesin damytý» taqyrybynda ótken dóńgelek ústelde Bas prokýror Jaqyp Asanov aıtty, dep habarlaıdy Qamshy.kz Baq.kz saıtyna sálteme jasap.
«Birinshiden, xalyqaralyq saýal joldaýdy da durys jaza almaımyz. Bizdiń saýaldar sheteldik standartqa saı kelmeı jatady. Tergeýshiler joldaǵan saýaldyń mátinin fransýz nemese nemis tiline aýdarǵan kezde, qujat maǵynasyz bolyp shyǵady eken. Sheteldegi áriptesterimnen birneshe xat aldym. Olar bizge shaǵymdanyp otyr. Óıtkeni, qarapaıym ǵana mysal retinde aıtaıyn, olar biz jazǵan saýaldyń mátinin de túsinbeı jatady. Bul qujat kimge kóbirek qajet? Árıne, bizge. Sondyqtan sheteldik áriptesterimiz bizdiń tildi ońaı túsiný úshin qoldan kelgenniń bárin jasaýymyz kerek. Bul ońaı emes. Biraq, júzege asyrýǵa bolady» , - dedi Jaqyp Asanov.
Sondaı-aq, ol prokýrorlardyń álemdik standart pen shet memleketterdiń talabyn oryndaı almaı jatatynyn da aıtty.
«Ásirese, Eýropa odaǵy, Ulybrıtanıa, AQSH elderiniń talaptaryn oryndaı almaı jatamyz. Árıne, tergeýshiler men prokýrorlarǵa ońaı emes. Biz olardy buryn oqytqan joqpyz. Al jeke óz kúshterimen qosymsha tálim alý qıyn. Bizdiń jeke metodıkalyq bazamyz da joq», - deıdi Bas prokýror.
Aıta keteıik, 24 qazannan bastap Bas prokýratýrada «Shetelden urlanǵan aktıvterdi qaıtarý» boıynsha Bas prokýratýra, Ulttyq búro, Memlekettik kirister komıteti jáne İİM qyzmetkerleriniń alǵashqy toby shet elderden kelgen sarapshylardan bilim alýda. Semınardyń qorytyndysy boıynsha 10 ulttyq trener daıyndalatyn bolady.
