«Nur Otan» partıasynyń Ortalyq apparatynda Parlament Májilisindegi partıa fraksıasynyń keńeıtilgen otyrysy ótti.
Onda 2015-2019 jyldarǵa arnalǵan «Nurly jol» ınfraqurylymdy damytýdyń memlekettik baǵdarlamasyn iske asyrý barysy talqylandy.

Otyrysqa birqatar memlekettik organdardyń basshylary, oblystar, Astana men Almaty qalalary ákim­deriniń orynbasarlary jáne basqa vedomstvolardyń ókilderi qatys­ty. Jıynda talqylanǵan másele­ler­di óńirlerdegi tıisti memle­kettik organ­dar­dyń jáne partıa­nyń jergilikti jer­lerdegi fılıal­darynyń basshylary da beıneekran arqyly kórip otyrdy. Al jıynǵa «Nur Otan» partıasy Tóraǵasynyń birinshi orynbasary Muhtar Qul-Muhammed tóraǵalyq etti.

Bes jylǵa – 5,3 trıllıon teńge

Keńeıtilgen otyrysty ashqan Májilistegi partıa fraksıasynyń jetek­shisi – Parlament Májilisiniń vıse-spıkeri Gúlmıra Isimbaeva osy jyldyń 24 naýryzynda bol­ǵan fraksıanyń alǵashqy jıynyn­da Mem­leket basshysy búdjet qar­jysyn jáne «Nurly jol» baǵ­dar­lama­syn júzege asyrýǵa Ulttyq qordan bólin­gen qarajatty tıimdi jumsaýdy y kúsheıtý týraly tapsyrma ber­genin atap ótti.

Bul baǵdarlama qazirgi kezeńdegi ekonomıkalyq saıasattyń negizgi ustyny bolyp tabylady. Sondaı-aq, óziniń áleýmettik baǵytty basty orynǵa qoıýymen de mańyzy joǵary, – dedi Májilis Tóraǵasynyń orynbasary.

Al jıynǵa tóraǵalyq etýshi «Nur Otan» partıasy Tóraǵasynyń birin­shi orynbasary Muhtar Qul-Mu­hammed jahandyq daǵdarystyń Qazaq­stan­nyń ekonomıkalyq jáne áleýmet­tik jaǵdaıyna keri áseriniń aldyn alýǵa 2014 jyly Elbasymyz iske qos­qan ınfraqurylymdy damytýdyń memlekettik baǵdarlamasy kóp septigin tıgiz­genine toqtaldy. Jalpy alǵanda, baǵdarlamany iske asyrýǵa 2015-2019 jyldary 5,3 trln teńge nemese 16,2 mlrd AQSH dollary kózdelgen. Keńes dáýirinen keıingi keńistiktegi birde-bir el jumyspen qamtýdy jáne ekonomı­kany qoldaýǵa osynshalyqty qara­jat bólip otyrǵan joq. «Nurly jol» baǵdarlamasyn júzege asyrýdyń arqa­synda shamamen 400 myń adam jumys­pen qamtylady. Sondaı-aq, baǵdar­lama tolyq kólemde, ıaǵnı 100 paıyzǵa qarjylandyrylady. Bıyl bul kór­setkish 770 mıllıard teńgeni nemese res­pýblıkamyzdyń 2001 jylǵy búdjetinen 1,5 esege artyq qarjyny qurady. Bul – tek bir ǵana baǵdarlama boıynsha bólingen qarajat. Ortalyq jáne jer­gilikti memlekettik organdardyń endigi mindeti – osy bólingen qarjyny tıimdi ıgerý, dedi partıa Tóraǵasynyń birinshi orynbasary.

Elbasymyz «Nurly jol» baǵdar­la­masyn júzege asyrý úshin bólingen barlyq deńgeıdegi qarjynyń tıimdi ári ýaqytyly jumsalýyn qatań baqylaýdy «Nur Otan» partıasyna tapsyrdy. Ótken jyly osy maqsatta Májilis pen máslıhattardaǵy partıa fraksıalary janynan baǵdarlamanyń 5 negizgi baǵyty boıynsha komısıa quryldy. Aýdandardy qosa alǵanda, elimiz boıynsha osyndaı 231 komısıa jumys isteıdi. Shamamen 400 nysan baqylaýǵa alynǵan. Bul jumysty jergilikti jerlerdegi partıa fraksıasynyń 700-den astam depýtaty men bastaýysh partıa uıymdarynyń ókilderi júrgizedi.

M.Qul-Muhammed «Nurly jol» baǵdarlamasynyń júzege asýy el ekonomıkasy men halyqty ju­myspen qamtý máselesine aıtar­lyqtaı oń áserin tıgizetinin, sonyń ishinde «Batys Eýro­pa – Ba­tys Qytaı» avtomagıstraliniń mańy­zy erekshe ekenine nazar aý­dardy. Onyń Qazaqstanǵa avto­jol­dardyń eýropalyq jáne azıa­lyq aımaqtyq júıesimen biri­gýge múmkindik beretinin de atap ótti. Sondaı-aq, partıa Tóra­ǵa­synyń birinshi orynbasary Aty­raý oblysyndaǵy «Ulttyq ındýs­trıalyq munaı-hımıa tehno­parki» arnaıy ekonomıkalyq aıma­ǵynyń zor áleýetin atady. Atal­ǵan ekonomıkalyq aımaq aýma­ǵynda polıpropılennen ónim óndirý isi jolǵa qoıylǵan. Buǵan qosa, Muhtar Abraruly «Nurly jol» baǵ­darlamasynyń negizgi baǵyt­tary­nyń biri – kásipkerlikti qoldaý ekenine toqtaldy. Bul baǵyt boıynsha 2015 jáne 2016 jyl­dary 185 mıllıard teńge bólingen. Sonyń arqasynda ótken jyldyń basynan bastap shaǵyn jáne orta bıznestegi 419 otandyq sýbekt 72 mıllıard 400 mıllıon teńge kóleminde jeńildetilgen nesıe aldy. Bul 14 myńnan astam ju­mys ornynyń saqtalýyna jáne 10 mıllıard teńgeden astam salyq­tyń tólenýine múmkindik berdi.

Infraqurylymdy damytý baǵ­darlamasy aıasynda sheshimin taýyp jatqan máselelerdiń biri – jalǵa beriletin qoljetimdi baspana qurylysy,  dedi ol osy jóninde. 2020 jylǵa deıin 1 mıllıon 400 myń sharshy metr baspana salý josparlanyp otyr. Búginde onyń 500 myńnan astam sharshy metri paıdalanýǵa berildi. Turǵyn úımen qamtylǵan 9 myńǵa jýyq otbasy nemese shamamen 40 myń adam qonys toıyn toılady. «Nurly jol» baǵdarlamasynyń arqasynda áleýmettik ınfraqurylymdy keń kólemde jańǵyrtý jumystary júrgizilýde. Búginde jalpy quny 34 mıllıard teńge bolatyn osyndaı 44 joba júzege asyryldy. Óz kezeginde bul bastama apattyq jaǵ­daıdaǵy jeti jáne úsh aýysym­men oqytatyn 23 mektep máselesiniń oń sheshilýine jaǵdaı jasady. Sondaı-aq, 4 myńnan asa búldirshin jańa balabaqshaǵa bardy.

Endi trıllıondap esepteıtin boldyq

«Nurly jol» memlekettik baǵ­darlamasyn negizgi ázirleýshi jáne soǵan jaýapty organ – Ulttyq ekonomıka mınıstrligi. Sondyqtan da alǵashqy sóz Ulttyq ekonomıka mınıstri Qýandyq Bıshimbaevqa berildi. Makroóńirlik ıntegra­sıalaý jolymen biryńǵaı ekono­mıkalyq naryq qurýǵa baılanys­ty alty makroóńirler retinde Oń­tústik, Ortalyq-SHyǵys, Batys, Soltústik jáne Astana men Al­maty qalalary belgilendi. Ulttyq jáne halyqaralyq deńgeıdegi hab­tar bolyp Almaty, Astana, Aqtóbe, Shymkent, Óskemen qala­lary alyndy,  dedi mınıstr. Olar kapıtaldar men resýrs­tar, ozyq tehnologıalar shoǵyr­lanatyn ortalyqtar bolady. Kóliktik-logıstıkalyq qury­lym­dardy tıimdi qurý úshin kom­mýnıkasıanyń barlyq túri Asta­nadan elimizdiń ózge makro­óńirlerine baǵyttalady. Sol sebep­ten Ortalyq – Ońtústik, Orta­lyq – Shyǵys, Ortalyq – Batys, Batys Eýropa – Batys Qytaı jáne bas­qa da jobalardy júzege asyrý jos­parlanǵan.

Q.Bıshimbaev ekinshi baǵyt retin­de elimizde ındýstrıalyq jáne týrısik ınfraqurylymdy damy­týdy atady. Makroóńirlerde arnaıy ekonomıkalyq aımaq­tar qurylysyn salý da qaras­ty­rylǵan. Onyń ishinde Atyraý obly­synda boı kóteretin ulttyq ın­dýstrıalyq munaı-hımıa teh­noparkiniń jáne «Qorǵas – Shyǵys qaqpasy» ar­naıy ekonomıkalyq aımaǵynyń qurylys jumystary bar. Sondaı-aq, ener­getıkalyq ınfraqurylymdy nyǵaıtý da kózdelip otyr. Almaty jáne Shyǵys Qazaqstan oblystaryn elektr energıasy­men senimdi túrde qamtamasyz etý maq­satynda jáne «Soltústik – Ońtústik» baǵytynda tranzıttik júk tasymalyn art­tyrý úshin «KEGOC» aksıonerlik qo­ǵa­my «Soltústik – Shyǵys – Ońtústik tran­zıti qurylysy» jobasyn júzege asyrady.

«Nurly jol» memlekettik baǵ­dar­la­masyna sáıkes 2020 jylǵa qaraı eli­mizde jalpy kólemi 4,5 mıllıon sharshy metrdi quraıtyn turǵyn úı paıdalanýǵa beriledi, dedi mınıstr ári qaraı. Bilim berý salasynyń ınfraqurylymyn damytýǵa basa kóńil bólinedi. Basymdyq apatty jaǵdaıdaǵy mektepter men úsh aýysymda oqytýdy joıýǵa beriledi. Qa­jettilik bo­ıynsha jalpy bilim bere­tin jańa mektepter salynady jáne paı­­­da­lanýǵa beriledi. Ulttyq qordan bóli­­netin jeńildetilgen nesıelik qara­jat­tyń aıtarlyqtaı bóligi qaıta óńdeý ónerkásibimen aınalysatyn iri kásipkerlik pen sha­ǵyn jáne orta bıznes sýbekti­lerine beriledi. Bul qarjy ınves­tısıalyq jobalardy júzege asyrýǵa, buryndary berilgen zaım­dardy qaıta qarjylandyrýǵa jáne aı­nalymdaǵy qarajatty tolyq­tyrýǵa da baǵyttalady. Zaım­dy alýshy tóleıtin jyldyq syı­aqynyń mólsheri 6 paıyzdy quraıdy. Zaım 10 jyl merzimge beri­ledi. 2020 jylǵa qaraı baǵda­r­lamany iske asyrý barysynda kásipkerlik sýbektiler óndiretin ónim kólemi 1,5 trıllıon teńgeni quraıdy.

Jıyn barysynda «Nurly jol» baǵdarlamasyna jasalǵan partıalyq baqylaýdyń aralyq nátıjeleri de jarıa etildi. Ol jóninde partıa fraksıasynyń jetekshisi, vıse-spıker Gúlmıra Isimbaeva partıalyq komısıanyń atalǵan baǵdarlamany júzege asyrýda birqatar máselelerdi anyqtaǵanyn atady. Al Májilis depýtaty Omarhan Óksikbaev kásipkerlerge nesıe berý isinde qarjylaı kómek alǵannan keıin búdjetke salyq tólemeý derekteriniń tirkelgenin jetkizdi. Onyń aıtýynsha, ázirge osyndaı 55 oqıǵa belgili bolǵan. Salyqtyń tólenbeý sebebi retinde qarjylaı qıyndyqtar men kompanıanyń óz jumysyn toqtatýy kórsetilgen. Osylaısha, qoldaýdyń óz isin dóńgeletip ketýge qabiletsiz kásip­oryndarǵa jasalǵany belgili bolǵan. Osyǵan oraı, halyq qalaýlysy mundaı nesıelendirýdiń naqty maqsattar boıynsha júrgizilýin jáne berýshi tarap pen kómek alýshy jaqtyń jaýapkershilikterin kúsheıtý kerektigin kóterdi.

Óz kezeginde sóz alǵan Májilis de­pýtaty Berik Ospanov turǵyn úı-kom­mýnaldyq sharýashylyǵyn jańǵyrtý máselesine nazar aýdardy. Negizi «Nur­ly jol» baǵdarlamasy boıynsha 2016 jáne 2017 jyldary 1182 sha­qy­rym komýnaldyq jeli júrgizý jospar­lanǵan. Onyń 170 shaqyrymy – bıyl, al qalǵan 1000 shaqyrymnan astam bóligi kelesi jyly júrgizilmek. Depýtat qurylysshylardyń mundaı úlken kólemdegi jumysty kórsetilgen merzimde aıaqtaı alatynyna kúmánmen qarady. Má­jilis depýtaty Pavel Kazansev Ulttyq ekonomıka mınıstrliginiń qurylys jáne turǵyn úı-kommýnaldyq sharýashylyǵy isi jónindegi komıteti 300, 600 jáne 900 oryndyq mektepterdiń qurylysyna arnalǵan tıptik jobalardy bekitkenin aıtty. Mundaı jobalar júzege assa, búdjet qarajatyn aıtarlyqtaı únemdeýge múmkindik beredi.

«Nurly jol» baǵdarlamasyn júzege asyrý is-sharalar josparynda jylýÓmen jáne sýmen qamtamasyz etý, sý qubyrlaryn tartý nysandaryna arnal­ǵan tıptik jospar men tıptik sheshim­der daıyndaý da qarastyrylǵan. Atal­ǵan jumystarǵa 1 mıllıard 200 mıl­lıon teńge bólinip otyr. Alaıda, Qara­ǵandy oblysynyń Sátbaev qalasyndaǵy mekteptiń qurylysyna 1 mıllıard 300 mıllıon teńge jumsalǵan. Al Ońtústik Qazaqstan oblysy, Saıram aýdany, Qarabulaq aýylyndaǵy osyndaı mektep 700 mıllıon teńgege salynǵan. Jumsalǵan qarjynyń aıyrmashylyǵy 2 eseden de kóp. Osyǵan baılanysty Muhtar Qul-Muhammed búdjet qarjysyn únem­deý maqsatynda áleýmettik jáne kom­mýnaldyq ınfraqurylym nysandary­nyń qurylysyna tıptik jobalardy qoldaný tájirıbesin keńinen engizý kerektigin aıtty.

Qosymsha baıandama jasaǵan Má­ji­listiń Ekonomıkalyq reformalar jáne óńirlik damý komıtetiniń tóraǵasy Nurtaı Sabılánov respýblıkalyq búdjetten jáne Ulttyq qordan bólinetin qarajattyń maqsatty jáne tıimdi jumsalýyna baqylaý júrgizý boıynsha tórt komısıa jumysynyń aıasynda anyqtalǵan máselelerge toqtaldy. «Kólik-logıstıka ınfraqurylymyn damytý» baǵyty boıynsha, baǵdarlamada josparlanǵan 11 dálizdiń 6-synda jumys júrgizilýde. Bul rette ýchaskelerdiń qurylysy birneshe jylǵa sozylyp ketken, keıbireýlerinde týyndaǵan daý­lar sotta qaralyp jatyr, dedi depýtat. 2015 jylǵy 1 qazandaǵy jaǵdaı boıynsha, 922 shaqyrymy paıdalanýǵa berildi. Merdigerler jáne kóptegen qosalqy merdigerler jol ýchaskelerin bólip-bólip alǵandyqtan, qarajat ýchas­kelerge bólshektenip ketken. Sondyqtan jumysty oryndaý merzimi sozylyp, sonyń saldary joldardyń sapasyz salynýyna ákelip soǵýda.

N.Sabılánovtyń atap ótýinshe, merdigerlermen sharttardy bir jylǵa jasaý shyǵyndardy, resýrstardy durys esepteýge jáne jumysty yńǵaıly josparlaýǵa múmkindik bermeıdi. Qarjylandyrý kesh júrgizilgendikten, negizgi jumys kólemi kúzde oryndalady, bul jumystardyń asyǵys ári sapasyz oryndalýyna, joldardyń merziminen buryn tozýyna ákelip soǵady. Jalǵa beriletin, sondaı-aq kredıttik turǵyn úı qurylysy, turǵyn úı-kommýnaldyq sharýashylyq ınfraqurylymyn jáne sýmen, jylýmen jabdyqtaý jelilerin jańǵyrtý baǵytyna kelsek, dep jalǵastyrdy sózin depýtat, 2016 jyly jalǵa beriletin jáne kredıttik turǵyn úı qurylysyna Ulttyq qordan 202,5 mlrd teńge baǵyttaldy. Onyń ishinde 180 mlrd teńge «Báıterek development» aksıonerlik qoǵamy arqyly, 22,5 mlrd teńge «Qazaqstan ıpotekalyq kompanıasy» aksıonerlik qoǵamy, 66,2 mlrd teńge «Samuryq-Qazyna» ulttyq ál-aýqat qory» aksıonerlik qoǵamy arqyly berildi. Aǵymdaǵy jylǵy 1 qyrkúıektegi jaǵdaı boıynsha 110,2 mlrd teńge nemese 54%-y ıgerildi. Bul rette jyl saıyn qaıtalana beretin birqatar ózekti máseleler bar. Ol – qurylysqa ruqsat beretin qujattardyń tolyq bolmaýy, ınjenerlik-kommýnıkasıalyq ınfra­qurylym júrgizý boıynsha jergilikti atqarýshy organdar men qurylys salý­shylardyń ózara kelisimsiz áreket etýi.

Depýtat, sondaı-aq áleýmettik ınfra­qurylymdy damytý baǵytyna da toqtaldy. Onyń keltirgen mysaldaryna qaraǵanda, atalǵan baǵyt boıynsha baǵdar­lamada jalpy qarjylandyrý ótken jyly 19,4 mlrd teńge, 2016 jyly 57,9 mlrd teńge bolǵan. Osy qarajat­qa 77 mektep pen 19 balabaqsha salý jos­parlanǵan. Áleýmettik ınfraqurylym nysandarynyń 46%-y paıdalanýǵa berilgen. Bıylǵy jylǵy 1 qazandaǵy jaǵdaı boıynsha, jergilikti atqarýshy organdar 36,4 mlrd teńgeni, ıaǵnı qarjylandyrý josparynyń 95,8%-yn ıgergen. Bul baǵyt boıynsha Ulttyq qordan bólingen qarajattyń durys, tıim­di paıdalanylmaý sebepteri – merdi­gerlermen daýlar týyndap, olar­dyń sotta qaralýynda, al qurylys-mon­taj jumystarynyń kesteden qalýy shart­tardyń kesh jasalýyna da baılanysty.

Májilismen Serik Qusaıynov «Qor­ǵas – Shyǵys qaqpasy» arnaıy ekono­mıkalyq aımaǵyndaǵy jaǵdaıdyń kóńil kónshitpeıtinine kópshiliktiń nazaryn aýdardy. Onyń sózine qaraǵanda, jalpy quny 83 mıllıard teńgeden asyp jyǵylsa da atalǵan aımaqta áli 17 joba aıaqtalmaǵan. Al negizgi úsh nysannyń tek bireýi ǵana jumys isteıdi. Al Muhtar Tinikeev kólik magıstraldaryndaǵy keıbir ózekti máselelerge qatysty pikir bildirdi. Depýtattyń aıtýynsha, «Nur­ly jol» baǵdarlamasyna sáıkes, 2015 jyldan beri «Almaty-SHý» (110 shaqy­rym) baǵytyndaǵy temir joldyń ekinshi jelisi salynýda. Onyń jalpy quny – 38 mıllıard 400 mıllıon teńge. Qazirgi tańda bul jumystyń tek 43 paıyzy ǵana istelgen. Al jospar boıynsha joba bıyl aıaqtalýy tıis. Osyǵan baılanysty depýtat qurylysshylardyń jumystyń qalǵan 53 paıyzyn úsh aıdyń ishinde bitiretinine senimsizdik bildirdi.

Baǵdarlama búdjetiniń jartysy jol qurylysyna baǵyttalǵan

Keńeıtilgen jıynda avtomobıl magıstraldaryn damytý máselesine de erekshe nazar aýdaryldy. Shamamen «Nurly jol» baǵdarlamasy búdjetiniń jartysy, ıaǵnı 2 trıllıon 400 mıllıard teńge jol qurylysyna baǵyttalǵan. Soǵan qaramastan «Ortalyq – Ońtús­tik» jobasy aıasynda «Astana – Temir­taý» bóligindegi josparlanǵan 171 shaqy­rymdyq joldyń tek 12 shaqyrymy ǵana nemese 7-aq paıyzy paıdalanýǵa beril­gen. Qazirgi kezde joldyń 33 shaqy­rymyna jol tósenishterin qaıta montajdaý jumystary júrgizilip jatyr. Joba quny shamamen 18 mıllıard teńgeni quraıdy. Joldyń atalǵan bóligindegi jumystardy aıaqtaý úshin nebári 3 aı merzim qaldy. Endi úlgere me?..

Májilismen Ersultan Bekturǵanov «Ortalyq – Shyǵys» jobasy boıyn­sha joldyń Ekibastuz qalasy men Aqsý aýyldyq aımaǵy bóliginde de jumys kestesinen aýytqýshylyqtar bar ekenin aıtty. Bul joldyń uzyndyǵy – 139 shaqyrym. Ótken 2015 jyly 23 sha­qyrymy ǵana salynǵan. Al bıyl jumys tek qazan aıynda Aqsý aýyldyq aımaǵy bóliginde bastaldy. Atalǵan bólikti tapsyrý 2017 jylǵa josparlanǵan eken. Májilis depýtaty Irına Aronova bilim berý salasyna júrgizilgen tekserýlerdiń nátıjeleri týraly baıandady. Prezıdenttiń úsh aýy­symmen oqytýdy, mektepterdiń apatty jaǵdaıyn tómendetýdi, mektepke deıingi bilim berý jáne 3-6 jas aralyǵyndaǵy balalardy oqytýdy qamtamasyz etýdi tapsyrǵany belgili. Soǵan oraı 2 jylda 77 mektep pen 19 balabaqsha qurylysyna 77 mıllıard 300 mıllıon teńge bólindi. Alaıda, Atyraý oblysynda 300 oryndyq orta mektep pen Shyǵys Qazaqstan oblysynda 280 oryndyq balabaqshany paıdalanýǵa berý merziminde keshigýge jol berilgen.

Otyrysta Májilis depýtaty Záýresh Amanjolova da sóz alyp, byltyr «Nur­ly jol» baǵdarlamasy sheńberinde eli­mizdiń 11 joǵary oqý ornyna 3 mıllıard teńgeniń ınovasıalyq zertteý­lerge arnalǵan laboratorıalyq qurylǵylary satyp alynǵanyn, biraq qondyrǵylardyń kóp bóligi talapqa saı bolmaı shyqqanyn jáne olardyń barlyq memlekettik standarttar bo­ıynsha úlgileri joq ekenin ortaǵa saldy.

Baǵdarlamanyń respýblıkalyq deń­geıde atqarylǵan jumystarymen qatar, ony oblystyq deńgeıde júzege asyrý barysy da nazardan tys qalmady. Osy máselege qatysty Májilis depýtaty Mıhaıl Chırkov Astana qalasynda baǵdarlama boıynsha áleýmettik ınfra­qurylymǵa bólingen qarajattyń 70 paıyzy ǵana ıgerilgenin tilge tıek etti. Bul – elimiz boıynsha eń tómen kórsetkish. Kóptegen basqa óńirlerge qaraǵanda, elordada júzege asyrylǵan jobalar da aıtarlyqtaı az, dedi ol. Al májilismen Ábdimanap Bekturǵanov keltirgen derekterge súıensek, Almaty oblysynda da merdiger tarapynan qarjylandyrýdyń bolmaýyna baılanysty eki kóp páterli turǵyn úıdiń qurylysy toqtap qalǵan. Bul nysandar jumys kestesinen 8 aıǵa kesh qalyp keledi.

Jalpy, elimiz boıynsha bıyl Ulttyq qordan jalǵa jáne nesıege beriletin baspana qurylysyna 202,5 mıllıard teńge bólingen. Biraq sonyń tek 54 paıyzy ǵana ıgerilipti. Májilis depýtaty Sapar Ahmetov atap ótkendeı, 2016 jyly Soltústik Qazaqstan oblysynda ınjenerlik ınfraqurylymdy jańǵyrtý boıynsha 23 jobany júzege asyrý úshin 4 mıllıard 200 mıllıon teńge bólinse, búginde sonyń tek 40 paıyzy ǵana ıgerilgen.

«Nur Otan» fraksıasynyń keńeı­tilgen otyrysyn qorytyndylaı kelip, Muhtar Qul-Muhammed: Elbasymyz jahandyq ekonomıkany jaılaǵan daǵdarysqa qaramastan, «Nurly jol» baǵdarlamasyna mıllıardtaǵan dollar kóleminde qarjy bólgizdi. Sol orasan zor qarajatqa atqarylǵan jumystyń sapasy, merzimi onyń maqsatty ıgerilýinde óreskel qatelikter jiberilýde. Endi bul másele udaıy partıa baqylaýynda bolady. Halyqqa arnalǵan árbir teńge sol halyqtyń ıgiligine aınalýǵa tıis. Sondyqtan «Nur Otan» partıasynan saılanǵan depýtattar men barlyq partıa uıymdaryna atalǵan máselelerdi qa­tań baqylaýǵa alýdy tapsyramyn. Bul baǵdarlamanyń árdaıym Elba­synyń erekshe nazarynda bolatynyn umyt­pańyzdar, dedi.

Fraksıa otyrysynyń qorytyndysy boıynsha Úkimetke, ortalyq memlekettik jáne jergilikti atqarýshy organdarǵa, sondaı-aq kvazımemlekettik sektordyń sýbektilerine baǵyttalǵan usynystar engizilgen qaýly qabyldandy. Soǵan sáıkes, endi tıisti quzyrly mekemeler «Nurly jol» baǵdarlamasy boıynsha atqarǵan jumystaryn jetildiredi.

Álısultan QULANBAI,

«Egemen Qazaqstan»