Osy aptada Almaty qalasynda Halyqaralyq tabıǵı apat qaýpin azaıtý kúnine oraı BUU-nyń ókildigi men QR İshki ister mınıstrligi Tótenshe jaǵdaılar departamentiniń uıymdastyrýymen alqaly bas qosý ótti. Tabıǵı apat qaýpin azaıtýǵa qatysty sharanyń taqyryby «LivetoTell» — aıtý úshin ómir súrý. Jıynnyń basty maqsaty tabıǵı apat oryn alǵan jaǵdaıda adam shyǵynyn boldyrmaý úshin kópshilikti saqtaný amaldarymen keńinen tanystyrý.
BUU-nyń Bas hatshysy Pan Gı Mýn Halyqaralyq tabıǵı apat qaýpin azaıtý kúnine arnalǵan joldaýynda bylaı dedi: «Búgingi Halyqaralyq tabıǵı apat qaýpin azaıtý kúninde men apatty basqarýdan qaýip-qaterdi basqarýǵa kóshý maqsatynda barlyq úkimet organdaryn azamattyq qoǵammen jáne jeke sektormen yntymaqtasýǵa shaqyramyn. Áreket etýden góri qaýiptiń aldyn alýǵa kósheıik».
Halyqaralyq tabıǵı apat qaýpin azaıtý kúni bıyl 25-shi ret atalyp ótýde. Osy ýaqyt aralaǵynda bul jahandyq mańyzy bar sharaǵa aınaldy. Bıylǵy jıynǵa Almaty qalasy Tótenshe jaǵdaılar basqarmasynyń ókilderi qatysyp, apattyń aldyn alýǵa baǵyttalǵan is-josparlarmen tanystyrdy.
QR İshki ister mınıstrligi Tótenshe jaǵdaılar jónindegi komıtettiń jedel qutqarý otrádynyń bólimshe bastyǵy Sábıt Qobjanov bul baǵyttaǵy jumystar «Adam ómirin arashalaýdaǵy naqty oqıǵalar» degen uranmen júrgizilip jatqanyn eske saldy.
Jıyn barysynda BUU-nyń IýNESKO, UNISDR, IýNISEF, UN-WOMEN, UNDP ókildikteri men Qoǵamdyq aqparat departamentiniń mamandary baıandama jasady. BUU mamandary Orta Azıa men Kavkaz aımaǵynda tótenshe jaǵdaılar kezinde adam shyǵynyn boldyrmaýǵa qatysty baǵdarlamalardyń mańyzyna toqtaldy. Jıynda sondaı-aq Qazaqstannyń Qyzyl Jarty Aı qoǵamynyń ókilderi 2015 jyly Almaty qalasy men jaqyn aýdandarda ótken sel kezinde turǵyndardy qutqarý tájirıbelerimen bólisip, vıdeorolıkter kórsetti.
Sharafat Jylqybaeva
