Tarazdaǵy 5513 áskerı bóliminde 46 jastaǵy praporshık tabeldi qarýymen atylyp óldi. Zeınetke shyǵýyna nebári 5 aı qalǵan Úsen Rapıshevti mundaı qadamǵa ne ıtermelegeni qazir tekserilip jatyr. Al marqumnyń jaqyndary onyń sýısıd jasaýyna basshylyq tarapynan kórgen qysym sebep ekenine senimdi. Sondyqtan 4 balasymen eńirep qalǵan jesiri kinálilerdiń qatań jazaǵa tartylýyn surap otyr.
Bul týraly Ktk arnasy habarlaıdy.
Atpaldaı azamattyń mezgilsiz qazasy jaqyndarynyń qabyrǵasyn qaıystyrdy. 5513 áskerı bólimde qarý-jaraq qoımasynyń bastyǵy bolǵan Úsen Rapıshevtiń óli denesi ótken juma kúni óziniń jumys ornynda tabylǵan. Týystarynyń aıtýynsha, ol ózin tabeldi qarýymen júrek tusynan atypty. 46 jastaǵy azamattyń sońynda áıeli men 4 balasy qaldy.
Aıagóz Rapıshova, Ú.Rapıshevtiń jesiri:
-Qazir ol ketti. Qazir oılanyp otyrmyn erteń myna tórt bala-shaǵama tamaqty qaıdan taýyp beremin. Men qalaı bulardyń oqýyn tóleımin. Qalaı eldiń arasyna shyǵaramyn, aıtyńyzdarshy. Meniń jalǵyz tiregim sol bolatyn. Bulardy qalaı jetkizerimdi bilmeımin.
Bes aıdan soń zeınetke shyqqaly jatqan azamattyń bulaısha ajal qushýy kóptiń kúdigin týǵyzdy. Marqumnyń baýyrlary ony ólimge basshylary ıtermelegenine senimdi. Aıtýlarynsha, Úsenniń syńary Asan da osy mekemede kınolog qyzmetin atqarǵan. Alaıda bir jyl buryn basshylyǵy oǵan ótemaqy bermeı zeınetke shyǵaryp jibergen. Qarjyny daýlaǵan Asan áskerı prokýratýraǵa aryz jazypty. Sodan beri áskerı shendiler inisiń sońyna túsipti-mys. Sóıtip, marqumnyń ólerinen bir kún buryn jumysqa keshikkenin jeleý etip qyzmetinen bosatpaq bolǵan kórinedi.
Asan Rapıshev, Ú.Rapıshevtiń aǵasy:
- Osy komandır polkanyń tapsyrmasy boıynsha, zam po tehqa da múmkin tapsyrma bergen shyǵar. Aqyry syńary jazyp jatqasyn osyny qurtaıyq dep. Meniń jazǵan arzyma baılanysty Úsen Rapıshovti qurtaıyq dep olar qysym jasady. Men solaı dep túsinemin.
Úsendi qyzmetinen ketirý jaıy kóterilgenin áskerı bólim komandıri de rastady. Jumysqa úsh saǵat keshikken deıdi óıtkeni. Biraq, onyń 16 jyl eńbek ótili baryn, ári zeınetke shyǵýyna nebári jarty jyl qalǵany eskerilip, mundaı shara qoldanylmas edi dep sendiredi. Al qysym jasaldy degendi moıyndaǵan joq.
Baǵdat Narbaev, 5513 áskerı bóliminiń komandıri:
-Ol ózin jaqsy qyrynan kórsete bilgen azamat. Nege sýısıd jasaǵanyn ózimiz de túsinbeı qaldyq. Aldyn-ala bul jaǵdaıǵa qatysty eshteme aıta almaıyz. Qazir tekserý júrip jatyr. Eger rasynda kináliler anyqtalsa, qatań jazaǵa tartylady.
Qazir áskerı tergeý basqarmasy bul derekke qatysty qylmystyq is qozǵap, tergeý júrip jatyr. Ázirge tek, marqumnyń Makarov tapanshasynan atylyp ólgeni belgili. Ózge málimetter tergeý qupıalyǵyna baılanysty aıtylmaýda. Sondaı-aq, qosa keteıik, Úsen Rapıshev ózine qol salardyń aldynda bul qadamǵa ne úshin barǵanyn jáne oǵan kimderdiń kináli ekeni kórsetilgen hat jazyp qaldyrǵan. Alaıda tildeı qaǵazdaǵy jazbanyń mazmuny ázirge aıtylmaı jatyr.
