Qalamgerler úshin qýan súıinshi habar! Keler jyldan bastap memleket jazýshylardyń jaǵdaıyna qaraspaq. Iaǵnı ádebıetshilerge búdjet esebinen qalamaqy tólenip, urpaq tárbıesine qajetti dep tanylǵan qundy kitaptary bes myń danamen basyp shyǵaratyn boldy,- dep habarlaıdy Qamshy.kz.
Tól ádebıetti damytýǵa baǵyttalǵan bul zań jobasyn keshe depýtattar men mádenıet maıtalmandary talqylap jatyr. Sý jańa qujat sarapshylardyń súzgisinen keıin parlamentke joldanady.
Mádenıet salasyna tyń serpin beretin jańa zań jobasynyń Almatyda talqylanýy beker emes. Aqyn-jazýshylar shoǵyrlanǵan, ádebı orta qashan da osy ońtústik astanada bolǵan. Qujattyń qabyldanýyna, ásirese, qalam ustaǵan qaýym asa múddeli. Sebebi, bul jolǵy zańda jazýshylarǵa búdjet esebinen qalamaqy tólep, shyǵarmalaryn tegin kitap etip basyp shyǵarý qarastyrylǵan. Ol úshin memleket esebinen bir jarym mıllıard teńge bólý kózdelip otyr eken.
Parlament Májilisi Tóraǵasynyń orynbasary Gúlmıra Isataıbekqyzy
- «Qazaqtyń aryq aıtyp, semiz shyq» degen sózi bar, sizderge tarqatyp aıtsaq budan bylaı memleket qandaı da bir redaksıaǵa kelip otyrǵan jazýshynyń shyǵarmasyn qoǵamǵa, rýhanıatqa kerek dep tanysa, avtordan satyp alyp, sol shyǵarmasyna qalamaqy tóleıdi. Búgingi úkimettiń jasaǵan jobasy boıynsha gonorar quny bir baspa tabaqqa 150 myń teńge bolady.
Osylaısha tól ádebıetti damytý máselesi endi zań arqyly rettelmek. Sebebi, sońǵy ýaqytta jazýshy degen attyń qadir-qasıeti joǵalyp barady deıdi qalamgerler. Ataq-dańqqa aldanyp kelgen aqyn-jazýshylardy alańdatatyn da suraqtar bar. Máselen, búdjet esebinen qarjylandyrylyp, qalamaqysy tólengen shyǵarmalarǵa shekteý kóp bolýy múmkin deıdi jazýshylar. Alaıda zań shyǵarýshylar eshkimniń aýzyna qaqpaq qoımaı qalamgerlerge shyǵarmashylyq erkindik beriledi dep otyr.
Bekbolat Tileýhan, Májilis depýtaty
-Kóp jaǵdaıda daıyn ádebıetti alamyz. Óıtkeni jazǵan kezde bylaı jaz dep aıtý konstıtýsıaǵa qaıshy. Óıtkeni onyń qalamyna tusaý berý senzýra bolyp ketedi. Al senzýra konstıtýsıamyzǵa tompaq keletin dúnıe.
Osyndaı kemshin tustar bolmas úshin atalǵan zań jobasy aqyn-jazýshylar men qoǵam qaıratkerleriniń talqysyna túsip otyr. Quqyqtyq qujat sarapshylardyń súzigisinen ótken soń jańa jylǵa deıin qabyldanady deıdi depýtattar.
