Qasqyrǵa qoı baqtyrǵan! Mańǵystaý oblysynda balyq ınspektorlarynyń ózderi brakonerlikpen aınalysypty. Qyzmettik qaıyqtaryna bekireni toltyryp alǵan olardy shekarashylar qolǵa túsirdi.

Bul týraly KTK arnasy habarlaıdy.

«Baıda» tıpti júrdek qaıyq oblystyq balyq ınspeksıasyna tıesili. Ashyq teńizde onyń beısaýyt júrgenin kórip, shekarashylar da jetken eken. Sóıtse, bildeı eki ınspektor men sol mekemeniń kúzetshisi eki bóshkege aýyzy-murnynan shyǵaryp qyzyl balyq tıep alypty. Ózderi muny brakonerlerden tárkiledik dep azar da bezer. Tipti jaǵalaý kúzeti ústerinen túskende, sasqandarynan qujattardy sol jerde atústi toltyrdy. Degenmen munysyna endi shekarashylardy emes, tergeýshilerdi sendirýi tıis. Óıtkeni, zańsyz balyq aýlaý deregi boıynsha qylmystyq is qozǵaldy. Inspektorlar brakonerlermen sybaılasty ma, álde bekireni ózderi aýlady ma, ony da sol polısıa anyqtaıtyn bolady.