Qytaıda esirtki tasymaldady dep aıyptalyp, ómir boıy bas bostandyǵynan aıyrylǵan Qazaqstan azamaty Aqjarqyn Turlybaıǵa qatysty birinshi satydaǵy sottyń jańa otyrysy bastaldy. Sot otandasymyz ustalǵan Gýandýn provınsıasy, Gýanchjoý qalasynda ótip jatyr, - dep habarlaıdy 24.kz.

Sot otyrysyna úsh sot, eki aıyptaýshy jáne A. Turlybaıdyń Qytaıdaǵy eki qorǵaýshysy men Qazaqstandaǵy advokaty Suńqar Nurmaǵambetov qatysýda. Sonymen qatar QR konsýldyq bólimniń basshysy Bolat Syrlybaev ta bar. Sotta aýdarmashy bolǵanymen suraqtarǵa Aqjarqynnyń ózi qytaısha jaýap berýde. 

Buǵan deıingi otyrystardyń barlyǵyna qatysqan Aqjarqynnyń anasy bul joly kele almady. Esterińizde bolsa, 21 jastaǵy Aqjarqyn Turlybaı 2014 jyldyń naýryz aıynda Qytaıdyń Malaızıamen shekarasynda esirtkimen ustaldy. Osy is boıynsha Gýanchjoý soty Aqjarqyn Turlybaıdy esirtki zattaryn tasymaldady dep aıyptap, ómir boıy bas bostandyǵynan aıyrdy. Keıin zańsyz esirtki aınalymymen kúres jónindegi Ortaazıalyq aımaqtyq aqparattyq ortalyq jerlesimizdi nıgerıalyq narkomafıanyń qurbany boldy dep málimdegen edi. Bıyl 7 sáýirde apelásıalyq satydaǵy sot Aqjarqyn Turlybaıdy ómir boıy bas bostandyǵynan aıyrý jazasyn ózgertý jáne isti birinshi satydaǵy sottyń qaraýyna jiberý týraly sheshim shyǵardy.