Olımpıadanyń eki dúrkin chempıony Ilá Ilın ulttyq jáne shtattyq komandalar dıreksıasynyń keńesshisi qyzmetine taǵaıyndaldy. Osyǵan oraı, búgin tanymal sportshyny Mádenıet jáne sport mınıstri Arystanbek Muxamedıulynyń ózi qabyldap, Prezıdenttiń sálemin jetkizdi,- dep xabarlaıdy  Qamshy.kz  QazAqparatqa silteme jasap.  

«Memleket basshysy dopıngke qarsy xalyqaralyq uıymnyń málimdemesi boıynsha qatty alańdap, el sportshylaryn nazardan tys qaldyrmaı, qoldaý jasaýdy tapsyrdy. Bizdiń ustanymymyz - Halyqaralyq Olımpıada komıteti qandaı qorytyndy shyǵarsa da, árbir sportshy óziniń qabilet-qarymyn barynsha paıdalanyp, ómirlik tájirıbesin keıingi izbasarlaryna qaldyrýy qajet», - dedi mınıstr.

Óz kezeginde Ilá Ilın jańa qyzmette ózine júktelgen mindetterdi abyroımen atqarýǵa tyrysatynyn jetkizdi. «Memleket basshysyna myń alǵys aıtamyz. Shyny kerek, barlyq sportshylar úshin ol (dopıng daýy - avtor) úlken soqqy boldy. Maǵan qatysty resmı xat áli kelgen joq. Degenmen, memlekettiń osyndaı qamqorlyq jasap jatqany qýantady. Múmkindik bolsa, Nursultan Ábishulyna meniń atymnan alǵys aıtyńyzshy. Meni surasa, bári durys, aman-esenmin deńiz», - dep atap ótti I.Ilın. Mınıstrdiń aıtýynsha, dopıng daýyna ilikken birde-bir sportshy qoldaýsyz qalmaıdy.