Tájikstan prezıdenti «ult kósemine» til tıgizýshini jazalaý zańyna túzetý engizý jobasyna qol qoıdy, dep habarlaıdy «Qamshy» portaly.

Tájikstan parlamentine jóneltiletin osy joba boıynsha, aqparat quraldary men ǵalamtor keńistiginde osy eldiń prezıdentine til tıgizetin adamdar bes jyl bas bostandyqtarynan aırylatyn bolady. Osy joba bekitilgen jaǵdaıda Tájikstannyń sot mekemeleri prezıdentke til tıgizýshi kisilerdi qamaý jazasynyń ornyna olardy qarjylaı aıyp tóletip te jazalaı alady.

Eske salatyn bolsaq, byltyr ǵana jeltoqsan aıynda Tájik parlamenti prezıdent Emomalı Rahmonǵa «Ult kóshbasshysy» mártebesin beretin zań jobasyn maquldady. Onda Rahmondy sotqa tartýǵa bolmaıtyny jazylǵan. Bul zań boıynsha Sovet Odaǵy qulaǵaly (1991 jyl – red.) Tájikstan bıligin eshkimge bermeı kele jatqan 63 jastaǵy burynǵy sovhoz (keńestik sharýashylyq fermasy – red.) dırektorynyń otbasy músheleri de qorǵalady. Iaǵnı, Rahmon áýletiniń músheleri men olardyń múlikterine tıisýge bolmaıdy.

Sondaı-aq, bıylǵy jyldyń 23 mamyrynda Tájikter Emomalı Rahmonnyń ómir boıy prezıdent bolýyn daýysqa salyp referendým ótkizgen bolatyn. Oǵan sáıkes, Konstıtýsıaǵa ózgerister engizýdi qoldap 94,5 paıyz saılaýshy daýys bergen. «Konstıtýsıaǵa ózgerister engizýge 134,121 myń adam nemese qatysýshynyń 3,3 paıyzy ǵana qarsy daýys berdi» dep málimdedi Tájikstan ortalyq saılaý komısıasy.

Osy referendým aıasynda Tájikstannyń qazirgi prezıdenti Emomalı Rahmon bılikte sheksiz qalýǵa múmkindik alǵan edi. Sonymen birge prezıdenttikke úmitker bola alatyn adamdardyń ortasha jasyn 35-ten 30 jasqa túsirdi. Iaǵnı Tájikstan basshysynyń úlken ulyna kelesi prezıdent saılaýyna qatysýǵa jol ashady.

Endi budan bylaı Tájikstan Konstıtýsıasy boıynsha dinı jáne ulttyq sıpatta saıası partıa qurýǵa da tyıym salynǵan bolatyn.