Nurtas Adambaı kınoteatrda aıaǵyn aldyńǵy oryndyqtyń ústine shyǵaryp otyratyn ádepsiz jandarǵa óz ókpesin bildirdi. Tanymal akterdiń  aıtýynsha, búginde jastar ǵana emes, eresek adamdar da qoǵamdyq orynda ózderin qalaı ustaý kerektigin bilmeıdi.

Bul týraly Qamshy.kz habarlaıdy. 

 Nurtas demalys kúnderi eki ret kınotetarǵa barǵanyn jáne ondaǵy keı kórermenniń qarapaıym ǵana kınotetarda otyrý etıketterin bilmeýine nalydy, jastardy bylaı qoıyp, eresek áıelderdiń aıaqtaryn oryndyqtarǵa asyp qoıyp otyratynyn aıtsańshy deıdi rejıser.

«Aıaǵyn kóterip otyrǵan jandarǵa eskertý jasaǵym keldi, alaıda olar menen alystaý jerde otyrdy. Kerek deseńiz búkil zalǵa da aıqaılaıyn degenmin. Biraq óz ata-analary tárbıeleı almaǵan jandarǵa meniń sózimniń ótýi ekitalaı. Meni ashýlandyrǵan nárse basqa. Sol aıaǵyn joǵary kóterip otyrǵan «mádenıetti jandardyń» arasynda jasy úlken áıeldiń bolýy. Syrt kózge qarasań deni túzý «tateshka».  Úp-úlken adamdar osyndaı áreketke baryp otyrǵan kezde jastardan ne suraımyz? Olar óz balalaryna ne úırete alady? Uıat degen bolý kerek qoı. Alaıda ondaılar uıalmaıdy. Áli kúnge deıin kınoǵa qalaı barý kerektigin bilmesek, 30 eldiń qataryna kirý týraly sóz qozǵaýdyń ózi artyq shyǵar?!» – dep jazdy ol jelidegi paraqshasynda.   

Jeli qoldanýshylary Adambaıdyń pikirin qostap, akterdiń el mádenıetine qatysty ózekti taqyrypty birinshi ret qozǵap otyrmaǵanyn jáne sáti kelse osyndaı dúnıelerge áleýmettik rolık túsirgeni jaqsy bolatynyn aıtyp jatty.