Pavlodar qalasynyń turǵyny Asqar Danıarov 2014 jyldan bastap týǵan jıeni Asanbaı Telqaraevty belgisiz jannyń aldaý joly arqyly Dýbaıǵa alyp ketkenin dáleldeı almaı, birtalaı quzyrly organnyń tabaldyryǵyn tozdyrýda, dep habarlaıdy QazAqparat.
Búgingi kúnge deıin jeti jasar bala jaıly habar-oshar ala almaı otyrǵan turǵynnyń aıtýynsha, QR Ulttyq qaýipsizdik komıteti basqarmasynyń basshysyna joldaǵan hattyń jaýabyna 2014 jyly 5-qazanda Asanbaı Telqaraevtyń «Almaty-Dýbaı» baǵytynda elden shyǵyp ketkeni týraly resmı habarlama kelgen. Alaıda balanyń kimniń jeteginde ketkeni jáne búgingi hal-jaǵdaıy beımálim. - 2009 jyly kúzde qyzym Gúlnar bosanǵan soń jol apatynan jaraqat alyp, № 1 emhanada jatty. Bas-mıy shaıqalyp, qabyrǵalary synǵan edi. 2010 jyly aıaǵyna turyp, júrip júre bastaǵan soń qudalarym Astanadaǵy qyzdaryna alyp ketti.
Alaıda ol jaqta otbasynda kıkiljiń týyndap, densaýlyǵy syr bere bastady. Kúıeý balam issaparda júrgen bolatyn. Jaǵdaıy nasharlaǵan soń, qyzymdy alyp kelýge týraly keldi. Quda men qudaǵı bala sonda bolsyn dep ótingen soń, ýaqytsha qaldyrýdy jón kórdik. Araǵa bes-alty kún salyp, jıenimniń jaǵdaıyn surap habarlasyp edim, eshkim telefonnyń tutqasyn kótermedi. Kóp uzamaı Gúlnardyń kúıeýi ajyrasýǵa ótinish bergeni týraly habarlama keldi. Buǵan qosa, áıeliniń ańǵaldyǵyn paıdalanyp, Baǵdat pen onyń qaryndasy balany Almatyǵa alyp ketken. Sońynda Almatyǵa baryp, 2010 jyly 3-jeltoqsanda qyzym men kúıeý balam ajyrasyp ketti. Sodan beri olardyń eshqaısysyn qolǵa túsire almadyq. 2012 jyly qyzym ulyna jaqyn bolý úshin Almatynyń iri túrik fırmasyna jumysqa esepshi-ekonomıst bolyp ornalasty. Ol talaı márte balasymen kezdesýge tyrysqanmen, esh nátıje bolmady. Sodan 2012 jyly balamen jolyǵyp, jarty saǵattaı boldym. Biraq anasy kelgenge deıin Asanbaıdy ákesi alyp ketti. Budan ári múldem habarsyz qaldyq, - deıdi Asqar Danıarov.
2015 jyly 10 qyrkúıekte Almaty qalasy Medeý aýdandyq soty balany anasy Gúlnar Telqaraevamen qaldyrý týraly sheshim shyǵarǵan. Asanbaı Telqaraev 2014 jyly mektep tabaldyryǵyn attaýy tıis. Degenmen Almaty qalalyq bilim berý basqarmasy jáne ishki ister departamentimen birlesip júrgizgen tekseris nátıjesiz aıaqtalǵan. - 2010 jyldan beri burynǵy kúıeý balam Baǵdat Telqaraevpen birneshe sot otyrysy ótip, sot qaýlysy shyǵaryldy. Alaıda ol bir de bir ret sotqa kelgen emes. Medeý aýdandyq ishki ister basqarmasy kámelettik jasqa tolmaǵandar isi jónindegi polıseıler men ýchaskelik ınspektorlar, sot oryndaýshylar burynǵy kúıeý balam men onyń qaryndasynyń úıine birneshe ret barǵan. Qudam únemi balasy men nemeresi birde Almatyda, birde Aqtaýda turady dep, jalǵan telefon nómirlerin beredi. Qazirgi kúni Gúlnar balany qaıtarý úshin taǵy da advokat izdestirýde, - dep, Asqar Danıarov balanyń bolashaǵyn oılap kókiregi qars aıyrylady.
