Aqtóbede «Oksıbıld» qurylys kompnıasynan páter alǵan turǵyndar baspanasyz dalada qalamyz ba dep shýlap jatyr. Aıtýylarynsha, kompanıa eskertpesten turǵyndarǵa satqan páterlerdi bankterge kepildikke qoıǵan. Onyń ústine qazir atalǵan kompanıanyń qarjy ortalyqtary men salyq komıtetine bereshegi kóbeıgendikten, menshiktegi barlyq jyljymaıtyn múlikterine buǵaý qoıylǵan kórinedi. Sonyń saldarynan turǵyndar ózderine tıesili páterge qujattardy da rásimdeı almaı júrgenderin aıtady. Kompanıanyń kepildikke qoıǵan úılerin bank tartyp alama dep taǵy qorqady.
Bul týraly 31 arna habarlaıdy.
Aınur Baıtorına osydan úsh jyl buryn «Oksıbıld» jaýapkershiligi shekteýli seriktestiginen eki bólmeli páter alyp, qonys toıyn toıladym deıdi. Tipti úı qunynyń alǵashqy 50 paıyzyn tólep, qalǵan 50 paıyzyna nesıege rásimdegenin aıtady. Biraq qýanyshy uzaqqa sozylmapty. Aınur ózine tıesili páterdi kompanıanyń bankke kepildikke qoıǵanyn tek jaqynda bildim deıdi. Endi úsh jyl boıy aıyna 100 000 teńgeden tólep kelgen baspanasynan aıyrylyp qalamyn ba dep qorqady.
AINUR BAITORINA, Turǵyn:
- Úısiz qalam ba qorqamyn. Potomý chto men áli sobstvennık emespin, úı maǵan aýdarylmaǵan. Men aldyńǵy jetide kompanıaǵa baryp kelgenmin kredıt tóleımin dep, ol jaqta ohrannıkter kirgizgen joq. Eshkim joq. Vse otpechatano, barlyǵy jabyq dep qaıtaryp jiberdi.
Munda Aınur sekildi baspanalarynan aıyrylyp qalýǵa qorqatyn turǵyndar kóp. Bári "Oksıbıld" qurylys qompanıasynan úı alǵandar. Tipti keıbiri úıge rásimdegen nesıelerin tolyq ótese de, páterlerin óz attaryna aýdara almaı júr eken. Óıtkeni kompanıanyń bankter men salyq komıteti aldyndaǵy qaryzynyń barlyǵynan menshigindegi jyljymaıtyn múlikteriniń buǵaýlanǵanyn aıtady.
GÚLNAR SÁRSENBAEVA, Turǵyn:
- Kirgende qýanyp kirdik bárimiz. Endi mynaý ne bolyp jatyr, ótirik aldap bizdi. Qandaı eńbekpen, jas adamdar, balalar mine eki jumys istep. Mynaý masqara ǵoı endi. Dalada qalaıyn dep turmyz ǵoı. Aldymyz qys.
Turǵyndardyń aıtýynsha, osy kúnge jaǵdaıdy kompanıa ókilderi kelip túsindirmepti. Máseleniń mán - jaıyn bilýge keńsege talaı ret barǵan. Biraq esik aýzynan qaıtypty. Turǵyndardyń kezdese almaı júrgen kompanıa basshysyn búgin keńseden ustadyq. Basshynyń bar aıtqany máseleni osy aıdyń aıaǵyna deıin sheshemiz boldy.
VIKTOR SIROTA, «Oksıbıld» JSHS dırektory:
- Qarashanyń 30 -na deıin barlyq jaǵdaıdy, onyń ishinde bank, salyq komıtetiniń máselelerin sheshemiz.
Osyǵan deıin de atalǵan qurylys kompanıasyna aqshalaryn salyp, baspanalaryn ala almaı júrgen bir top aqtóbelikter shý kótergen bolatyn. Endi páter alyp, qonys toıyn toılaǵandar baspanasyz qalýdan saqtanady. Endigi amaldary oblys ákiminen kómek surap hat joldaý.
