Almaty oblysynyń Qarasaı aýdanynda turatyn aqsaqal sheneýnikke shaǵym aıtamyn dep, odan taıaq jegenin alǵa tartýda. Atqaminerdi birneshe kún boıy jumys ornynan tappaǵan turǵyn tańerteń basshynyń úıine baryp, aqyr sońynda mıy shaıqalyp, beti men keýdesi kógeripti. Ákimge jábirlenýshiniń aıtqan aqyly unamaǵan kórinedi. Al osy oqıǵadan beri eki kún ótse de, polıseıler bolǵan jaıtty aýdan basshylyǵyna habarlamaǵan eken.

Bul týraly Ktk arnasy habarlaıdy.

66 jastaǵy Tólendi Tańatarov ákimniń «erekshe» qabyldaýynan keıin denesinde qalǵan belgilerdi kórsetýde. Atqaminerdiń soqqysynan onyń mıy shaıqalyp, beti men keýdesi kógeripti. Birinshi Maı aýyldyq aımaǵynyń basshysyn ákimdikke san ret izdep baryp tappaı qaıtqan jábirlenýshi onymen úıinde kezdespek bolǵan eken. Biraq bunysy sheneýnikke unamaǵan kórinedi. Al zeınetkerdiń aıtpaǵy – aryq máselesi eken.

Tólendi Tańatarov, Qaınar aýylynyń turǵyny:

–Taýdan aǵatyn sýdyń barlyǵy osymen aǵyp, bylaı qaraı ketetin bizdiń úıdiń janynan. Sol-aq eken, «Sen kimsiń, maǵan aqyl aıtatyn, seni joq qylyp jiberemin»dep judyryqpen urdy. Taıaǵym ushyp ketti. Odan keıin jaǵamnan súırep, úıge kir deıdi. Kalıtkasyna kirgizip, urdy.

Zeınetkerdiń aıtýynsha, judyryq jumsaýǵa ákimniń uly da qarsy bolmapty. Eki jaqtap qol kótergender ony kishigirim aýylda alystan kózge túsip, ózgelerden erekshelenetin myna saraıda bir saǵat ustap, keıin jibergen. Bul úı – Birinshi Maı aýyldyq aımaǵynyń ákimi Muratbek Qarnaqovtyń baspanasy. Bir qyzyǵy tentek ákimniń ústinen aryz jazylǵan soń uzaqtan beri sheshilmeı kele jatqan aryq máselesi birden qolǵa alynǵan.

–Men taıaq jegennen keıin qolǵa aldy. Kesheli beri qazyp jatyr. Kómek suraımyn dep baryp, taıaq jep kettim. Ákim – halqyńa jaqyn bol deıdi, bunyń istegeni osy. Menen basqa adamdardy da urǵan shyǵar. 

Ákimniń erekshe sóılesý stıli týraly aýdan basshylyǵy habarsyz bolyp shyqty. Olar bundaı oqıǵanyń bolǵanyn estimedik dep at-tondaryn ala qashýda.

–Iaǵnı ol kisige qatysty eshqandaı shara qoldanbady ǵoı?

-Ony sizden birinshi ret estip otyrmyn .

Al kúzetshi men beınekamera ornatylmaǵandyqtan qaqpany únemi jaýyp júremiz, sondyqtan bóten adamnyń úıge kirýi múmkin emes degen Qarnaqov eshkimdi uryp-soqpaǵanyn aıtyp, ózine shań jýytpaı otyr.

Muratbek Qarnaqov, Birinshi Maı aýyldyq aımaǵynyń ákimi:

–Esik te jabyq bolady. Onyń ústine qaqpa da jabyq turady. Maǵan jumysqa da kelmegen, aýdanǵa da barmaǵan. Ózderińizden búgin ǵana bilip otyrmyn. Ondaı adamdy kórmedik tipti.

Ákimniń ústinen ýchaskelik polıseı men aýdandyq prokýratýraǵa aryz jazylyp, dene jaraqattary jaıly medısınalyq anyqtama alynǵan. Biraq tártip saqshylarynyń osy ýaqytqa deıin ekinshi taraptan túsinik almaǵany men aýdanǵa habarlamaǵanyn eskersek, is saǵyzsha sozylatyn syńaıly.