Moldavıanyń sosıalıser partıasynyń kóshbasshysy Igor Dodon el prezıdentiniń tikeleı saılaýynda jeńiske jetkenin jarıalady, dep habarlaıdy QazAqparat.

 «Men búgingi saılaýda jeńiske jetkenimizdi nyq senimmen aıta alamyn. Muhıttyń ar jaǵynda daýys berý jalǵasyp jatyr. Alaıda, bizdiń osy ýaqyttyń ózinde 50 paıyz jáne plús bir daýys jınaǵanymyz belgili boldy.

Biz jeńdik»,-dedi ol brıfıńte. Dodon óziniń Eýropany qoldaýshy oń kúshterdiń atynan saılaýǵa túsken qarsylas kandıdaty Maıe Sandýdy elektoratty tynyshtandyrýǵa shaqyrdy. «Men sizdiń jaqsy ári laıyqty nátıje kórsetkenińizben quttyqtaımyn. Alaıda, qazir biz qoǵamnyń ekige jarylýynyń aldyn alýymyz kerek»,-dedi sosıalıs. Dodonnyń sózinshe, ol búkil Moldova halqynyń prezıdenti bolady. Iaǵnı ońshyldardyń da, solshyldardyń da, óziniń jaqtastary men qarsylastarynyń da. Sandý daýys berý ýchaskelerin jabyla salysymen osy jolǵy prezıdenttik saılaýdyń nashar uıymdastyrylǵandyǵyn aıtqan. Onyń pikirinshe, bılik ókilderi onyń shet memleketterdegi saılaý ýchaskeleri men daýys berý búletenderiniń sanyn arttyrý jónindegi talabyn nazarǵa almady. Sandý eldiń Syrtqy ister mınısti men Ortalyq saılaý komısıasy basshysynyń qyzmetten ketýin talap etti. Sebebi Londondaǵy saılaý ýchaskeleriniń birinde daýys berý búletenderi bitip qalǵan. Iaǵnı, respýblıka azamattarynyń daýys berý quqyqtary shekteldi. Moldavıanyń Ortalyq saılaý komısıasynyń málimetterinshe, hattamalardyń 98,32 paıyzy eseptelgennen keıin Dodonnyń 54,24 paıyz, al, Sandýdyń 45,76 paıyz daýys jınaǵandyǵy belgili boldy, dep jazdy lenta.ru.