Bıyl – Táýelsizdikke 25 jyl. Shırek ǵasyr tolyp otyrǵan Táýelsizdik mereıtoıy qoǵam úshin zor mańyzǵa ıe. Máni men mańyzy úlken jaýapkershilik pen azamattyq paryz júktep otyrǵan Táýelsizdik toıyna óner ujymdary da óz úlesterin qosýda. Bul týraly «Qamshy» portaly M.Áýezov teatrynyń Baspasóz qyzmetine silteme jasap habarlaıdy.

M.Áýezov teatry Táýelsizdiktiń 25 jyldyǵy aıasynda birqatar is-sharalardy abyroımen ótkizdi. Sol is-sharalardyń ishindegi shoqtyǵy bıik, ıdeıalyq-mazmundyq turǵydan memlekettik saıasattyń jemisin kórsetip, ony odan ári nasıhattaýǵa serpin berip, qoǵam birliginiń nyǵaıa túsýine yqpal etken «Aqtastaǵy Ahıko» spektakli.

Táýelsizdiktiń 25 jyldyǵy aıasynda 91-maýsym shymyldyǵyn ashqan Mádına Omarovanyń «Aqtastaǵy Ahıko» spektakliniń ár qoıylymy anshlagpen ótip, kórermenniń joǵarǵy baǵasyn aldy. Sonymen qatar, respýblıkalyq BAQ ta keńinen jazylyp, ártúrli pikirler men kózqarastardyń týýyna sebepshi bola otyryp, el ishine keń tarap, jurtshylyqtyń qyzyǵýshylyǵyn týǵyzdy.

Elimizdegi «Bir halyq – bir el – bir taǵdyr» - qoǵamdaǵy birlik pen tatýlyqty, turaqtylyqty nyǵaıýtýǵa baǵyttalǵan saıasattyń sahnadaǵy naqty kórinisindeı bolǵan aıtýly spektákldiń ómirge kelýi de erekshe. Bul týraly teatr dırektory Erlan Bilál bylaı dep eske alady.

«Ǵabıt Músirepov atyndaǵy Qazaq Memlekettik balalar men jasóspirimder teatrynda kórkemdik jetekshi bolyp jumys istep júrgenimde teatr Qaraǵandy qalasyna gastróldik saparǵa bardy. Sol saparda qazirgi Májilis depýtaty Nurlan Dýlatbekovke jolyqtym. Ol kisi áńgime barysynda bir taǵdyrly kisi jaıly biletinin alaıda eń áýeli KARLAG túrmesiniń ornyndaǵy mýzeıge baryp kórip kelýimdi ótindi. Bardym. Kórdim. Mýzeıden alǵan áserim janǵa, sanaǵa óte aýyr boldy. Neshe kún sol kúıden aıyǵa almaı júrdim. Sodan Nurlan aǵa Ahıkonyń taǵdyrly ómir jolyn áńgimelep berdi. Sóıtip, Ahıko Tesýronyń ómirin arqaý etken qoıylym jasaýdy uıǵardyq. M.Áýezov teatryna basshy bolyp taǵaıyndalǵan soń, teatr dramatýrgi Mádına Omarovaǵa aıtyp, Ahıkonyń taǵdyrynan pesa jazýyn ótindim. Mádına Ahıko Tesýro turyp jatqan Aqtas aýylyna baryp, aqsaqalmen jolyǵyp, ómirin óz aýzynan estidi. Osylaısha, «Aqtastaǵy Ahıko» pesasy ómirge keldi. Al, shyǵarmany sahnaǵa shyǵaryp, qoıylym qoıý úshin talantty rejıser, «Qara shekpen», «Qoshtasqym kelmeıdi...» spektáklderi arqyly kórermen yqylasyna bólengen Asqat Maemırovty arnaıy shaqyryp, «Aqtastaǵy Ahıko» pesasyn sahnalap berýdi ótindik.»

«Aqtastaǵy Ahıko» spektakliniń sahnaǵa shyǵyp, kórermenmen qaýyshýyna Mádenıet jáne sport mınıstri Arystanbek Muhamedıuly zor yqpal jasap, jan-jaqty qoldaý kórsetti. Mınıstrdiń aıryqsha kóńil bólýiniń nátıjesinde spektákl joǵary dárejede sahnalandy.

Osylaısha, M.Áýezov teatry Táýelsizdiktiń 25 jyldyǵyna úlken rýhanı syı tartý etti. Qoǵamda úlken qyzyǵýshylyq týdyryp, ár qoıylymy anshlagpen ótken derekti dramanyń bas keıipkeri Ahıko Tesýronyń taǵdyryn Qazaqstan Prezıdenti N.Nazarbaev Japonıaǵa resmı sapary barysynda Japonıa Parlamentinde sóılegen sózinde tilge tıek etip, sol arqyly Qazaqstandaǵy turaqtylyq pen tatýlyqty syrt elderge úlgi etti. Óz kezeginde bul da «Aqtastaǵy Ahıko» qoıylymynyń jetistigi.

Mine, endi Ahıko Tesýronyń sahnalyq beınesimen, taǵdyrymen arqa jurty qaýyshpaq. Teatrdyń Qaraǵandy jáne Astana qalalaryna jasalatyn gastróldik saparynda «Aqtastaǵy Ahıko» qoıylymyn 25 qarashada Ahıkonyń jerlesteri, qaraǵandylyqtar tamashalaı alady. Al, 29 qarashada «Aqtastaǵy Ahıko»  Beıbitshilik jáne kelisim saraıynda Astana jurtynyń nazaryna usynylady.

Táýelsizdiktiń 25 jyldyǵyna arnalǵan eń iri óner tartýy – «Aqtastaǵy Ahıko» spektaklin kórýge asyǵyńyzdar!