17-19 qarasha kúnderi Qazaqstanda 40 gradýsqa deıingi aıaz kútilýde, dep habarlady «Qazgıdromet» RMK.  «Úskirik aıazdar Qazaqstannyń soltústik jáne shyǵys oblystaryna keldi. Bul aýdandardaǵy ortasha táýlik temperatýrasy osy kezde bolatyn klımattyq normadan 10...18 gradýsqa tómen. Mundaı aıazdar Kar teńiziniń ústinde túzilgen salqyn ári kúshti antısıklonnyń yqpalymen keldi. Respýblıka aýmaǵyndaǵy antısıklonmen birge arktıkalyq aýa massalary da túsýde, sondyqtan eń tómengi temperatýra 30...36 gradýsqa deıin tústi», - delingen habarlamada. Mundaı sınoptıkalyq jaǵdaı aldaǵy úsh táýlikte saqtalady, al ortalyq pen shyǵysta túngi temperatýra tómendeı beredi, tipti keı aýdandarda -40 gradýsqa deıin sýytady. Qazaqstannyń ońtústik-shyǵysynda sýyq aǵymdardyń áserinen jaýyn-shashyn men qar jaýady jáne temperatýra tómendeıdi.