Pavlodar oblysy, Aqsý aýdany, Paramanovka aýylynda kásipkerler men jergilikti shetelden kóship kelgen qandastarymyz arasynda kıkiljiń oqıǵa oryn aldy. Naqtyraq aıtsaq, bul daýdyń bastalǵanyna bir aıdan asty.

   Paramanovka aýylynyń turǵyndary Aqsý aýdanynyń ákimi Bolat Baqaýovqa shaǵymdanýda. Mamyr aıynyń aıaǵyna taman belgisiz bireýler Paramanovka aýyly turǵyndarynyń 55-ke jýyq jylqysyn tartyp áketken. Urlap emes, qýyp emes, qorasynda turǵan jerinen tartyp alǵan. Bul aýyldyń turǵyndarynyń kóbi Mońǵolıadan kóship kelgen qandastar. Nesıege jylqy alyp, sony kásip etip otyrǵandar, bir-aq kúnde jep otyrǵan nandarynan, taýyp otyrǵan nápáqalarynan aırylyp qaldy. Atalǵan aýyldyń turǵyny Nursáýle Ahaıdyń aıtýynsha, úsh jarym mıllıon teńge kredıt alǵan. Aıyna sol úshin 137 myń teńge bankke tóleıdi. Endi mine, muń-zaryn kimge aıtaryn bilmeı otyr. Mońǵolıadan kelgender, oralmandar súıener jeri, arqa súıer tiregi joq dep basynǵany bolar deıdi kózi jasty, kóńili sherli, aıdyń-kúnniń amanynda menshikterinen aırylyp qalǵandar. Quqyq qorǵaý organdaryna shaǵymdanǵan jábirlenýshiler olardan esh qaıran bolmady deıdi. Tipti, jylqyny tartyp áketkender qoranyń esigin ashpasa Astanadan arnaıy jasaq aldyryp, qyryp tastaımyz dep qorqytqan. Aýyl adamdary jylqylaryn qalaı tıep jatqan sátterin bárin vıdeoǵa, fotoǵa túsirip alǵan. Qoldarynda dálelderi bola tura aq-adal malymyzdy qaıtara almaı otyrmyz deıdi. Aýyl turǵyndary jylqylaryn «Baqyt» sharýa qojalyǵyna baqqyzady eken. Al sharýa qojalyǵynyń basshysy sonyń aldynda ǵana kórshi sharýa qojalyqtan 14 bas jylqy satyp alǵan. Artynan jylqyny satýshylar malymyzdy urlap aldyń dep, qojalyqtan bólek aýyl turǵyndarynyń da jylqylaryn alyp ketken. Al, Aqsý qalasynyń ákimi bolsa jaǵdaı óziniń tikeleı baqylaýynda ekenin, 1 aptanyń ishinde maldaryn qaıtaryp beretinin jetkizgen bolatyn. «Nur Otan» partıasy da maldaryn qaıtaryp beremiz degen ýáde beripti. Biraq, ol ýádeler ýáde kúıinde qalǵan.

   P.S. Jylqylaryn qaıtaryp alýǵa Nurkenovtyń sharýa qojalyǵyna barǵan japa shegýshilerdi sharýa qojalyǵynyń qyzmetkerleri polısıasymen qosyp tas atyp qýypty. «Senderge bir jylqy da bermeımiz» dep aıtypty degen málimet aldyq.

  Ońǵar Qabden, Kereký

Maqala janaozen.net saıtynan alyndy

sýret: www.com.kz