Qaraǵandy oblysy Jezqazǵan qalasynyń basshylyǵy qala aýmaǵyndaǵy mekeme, uıymdarǵa Jańa jylǵa daıyndyq sharalaryn el Táýelsizdiginiń 25 jyldyq mereıtoıy atalyp ótkennen keıin bastaý týraly usynys tastady, - dep habarlaıdy Qamshy.kz qala ákimdiginiń baspasóz qyzmetine silteme jasap.

Táýelsizdiktiń 25 jyldyǵyn laıyqty atap ótý úshin qala ákimdigi arnaıy is-sharalar josparyn ázirlegen. Osy josparda belgilengen sharalar ótpeıinshe qala aýmaǵynda jańa jylǵa daıyndyq sharalaryn bastamaý týraly ortaq sheshim qabyldanypty.

«Memleket basshysynyń «Qazaqstan Respýblıkasy Táýelsizdiginiń 25 jyldyǵyn merekeleý týraly» 2016 jylǵy 28 naýryzdaǵy Jarlyǵyna sáıkes egemendik mereıtoıyn laıyqty atap ótý jónindegi keshendi sharalar jospary ázirlendi. Jyl boıy Táýelsizdiktiń 25 jyldyǵyna arnalǵan is-sharalar ótip keledi. Prezıdent Jarlyǵymen bekitilgen «Birlik pen Jasampazdyqtyń 25 jyly» tujyrymdamasy boıynsha mereıtoı qarsańynda repýblıka aýmaǵynda «Uly Dala Eli – Táýelsizdiktiń 25 negizi» ataýymen negizgi merekelik oqıǵalar kúntizbesi júzege asady. Qala ákimi osyǵan oraı «Qazaqstan Respýblıkasy Táýelsizdiginiń 25 jyldyǵyna 25 juldyzdy kún» merekelik sharalar josparyn bekitti. Ol qujat boıynsha joǵaryda atalǵan tujyrymdamaǵa saı 21 qarasha men 15 jeltoqsan aralyǵynda birqatar aýqymdy sharalar ótedi», - deıdi qala ákiminiń orynbasary Zına Aqylbekova.

Ákim orynbasarynyń aıtýynsha, bul kúnderi elimizdiń egemendik jyldary jetken jetistikterin nasıhattaý, memlekettik rámizderge qurmetpen qaraýǵa baǵyttalǵan patrıottyq, kópshilik sharalardan bólek, birneshe óndiris, kásipkerlik nysany ashylyp, iske qosylmaq.

Jezqazǵan ákimdigi el Táýelsizdiginiń 25 jyldyǵyn laıyqty atap ótý úshin óńirdegi mekeme, uıymdarǵa jańa jylǵa daıyndyq sharalaryn 18 jeltoqsannan keıin bastaý týraly usynys jasaǵan. Ákimdik usynysyn qala kásipkerleri, túrli kásiporyn, mekeme basshylary qoldap, Táýelsizdik toıynyń shyrqyn ketirmeýge ýaǵdalasypty.