EKSPO aýmaǵynda úlken apat! Astanadaǵy halyqaralyq kórme  ótetin nysandardyń biri paıdalanýǵa berilmeı jatyp qırady. Pavılondardyń ortasyn baılanystyryp turǵan kópir tús mezgilinde opyrylyp túsken. Ázirge apattyń sebebi belgisiz. Qulap qalǵan kópirdi BI Group salǵandyqtan, qurylys kompanıasynyń ózi ony qalpyna keltirmek. Oqıǵa ornynda tekserý júrip jatyr.

Bul týraly KTK arnasy habarlaıdy.

Bomba túskendeı ǵoı. Qar shyǵar dep oıladyq. Eńbegimiz bosqa ketti. Qaıta túski astyń kezi bolyp aman qaldyq.

Memlekettiń mıllıardtaryna salynǵan elimizdegi eń aýqymdy qurylys aýmaǵyndaǵy nysan dál osylaı jumysshylardyń kóz aldynda qırap qalǵan. Uıaly telefonyna túsirip turǵan qurylysshylar jyldar boıǵy eńbegimiz esh ketti dep ókinýde. Qaıta, apat túski ýaqytta bolǵandyqtan, eshkim zardap shekpegen. Al nysannyń qulaǵanyn kózben kórgen jumysshylar suhbat bergisi kelmedi.

-Obekti jabyq. Eshkimdi jibermeımiz. Ketińizder!

Opyrylyp qalǵan kópir týra Qazaqstanǵa tıesili shar ispettes nysan men jýyrda ǵana sheteldik ıelerine tabystalǵan halyqaralyq pavılondardyń arasyna salynǵan eken.

«Astana Ekspo-2017» UK» AQ Qoǵammen baılanys departamenti:

-Búgin saǵat 13.30-da   Halyqaralyq  mamandandyrylǵan kórme terıtorıasynda S1 men S2 pavılondary arasyndaǵy dekoratıvti kópir retinde salynǵan qurylym qulady. Janyndaǵy ǵımarattarǵa zıan kelgen joq. Nysannyń merdigeri BI Group bolǵandyqtan, qurylys kompanıasy  kópirdi qalpyna keltiretin bolady.

Osylaısha, halyqaralyq kórme ótetin nysandar paıdalanýǵa berilmeı jatyp qıraýda. Qaıta qonaqtardyń kózinshe qulap, elimizdi uıatqa qaldyrmaǵany abyroı boldy.

Kúzetshiler EKSPO-nyń apat bolǵan aýmaǵyna adam jýytpaıdy, jiti qaraýyldap tur. Al jumysshylardyń aıtýynsha, halyqaralyq kórme ótetin jerde qurylys ýaqytsha toqtap tur. Oqıǵa ornynda tekseris  júrýde  jáne ásemdik úshin salynǵan ótkeldiń qulaýyna ne sebep bolǵany anyqtalýda.

Kópirdi salǵan BI Group zardap shekkenderdiń joq ekenin jarıalady. Jáne kelgen shyǵyndy da eseptep jatyr eken. Aıta ketý kerek, EKSPO basshylary jýyrda ǵana halyqaralyq kórmege qatysatyn bes el: Qytaı, Fransıa, Germanıa, Túrkıa men Vengrıa ókilderine tıesili pavılondardy bólip bergen edi. Uıymdastyrýshylar áli ondaǵan nysandy ıelerine tapsyrýy tıis. Al júzden asa memleket qatysatyn halyqarlyq kórmeniń bastalýyna búgin týra 206 kún qaldy. Al EKSPO 10-shy maýsymda ashylyp, úsh aı ótedi. Halyqaralyq sharany kórýge 5 mıllıonǵa jýyq adam keledi dep josparlanýda.