Jaqynda Almatyda keremet boks keshin ótkizip, qarsylasy Patrık Aloteıdi upaı sanymen jeńgen Qanat Islamnyń NUR.KZ portalyna eksklúzıvti suhbaty jarıalandy. Bul suhbatta Qanat óziniń jekpe-jegine qatysty «Qamshy» portalynda kóp talqylanǵan kúmándi áńgimeler týraly da aıtqan. «Qamshy» portaly Qanat Islamnyń suhbatyn yqshamdap oqyrman nazaryna usynady.
- Qanat, elimizde buryn sońdy bolmaǵan kásipqoı boks keshin ótkizdińizder. Áńgimemizdi aldymen osy boks keshinen bastaıyqshy. Uıymdastyrýda qandaı qıyndyqtar boldy?
- Kóp adam sıatyn arenada túrli-tústi jaryqtarmen shoý jasalǵan álemdik deńgeıdegi kásipqoı boksty telearnadan ǵana kórip, ony Amerıka nemese Germanıada ǵana ótkizýge bolady dep oılaıtyndar joq emes. Biraq, osy jarystan soń kóp adamnyń oıy ózgerdi. Shetelden kelgen qonaqtar: «Qanat nege Amerıkada jekpe-jek ótkizip júr, munda bári bar ǵoı» - dep tań qalypty. Bul jekpe-jekti sheteldiń birneshe telearnalary kórsetkenin bilesizder. Kásipqoı boks keshi óte joǵary baǵaǵa ıe boldy.
«Golden Boy Promotions», «Top Rank Promotions» jáne de kóptegen promoýterlik kompanıalar búginge deıin habarlasyp, Qazaqstanda jekpe-jek uıymdastyrýǵa usynys aıtyp jatyr. Bizde qazir bári bar. Elbasymyz barlyq jaǵdaı jasap jatyr. Úlken arena salyndy. Osy jarystyń ótýin Almaty qalasynyń ákimi Baýyrjan Baıbek aǵamyz qoldap, Baýyrjan Ospanov aǵam bastap Keńes Raqyshev, Aıdyn Rahymbaev aǵalarym demeýshilik jasady. Shetelden tóreshiler, WBA, WBO, UBC tujyrymdarynyń ókilderi kelip, jarystyń joǵary deńgeıde ári ádil ótýin baqylady. Jarysqa joǵary baǵa berdi.
Meniń bir armanym oryndaldy. Osyndaı boks keshin qazaqstandyqtarǵa syılaǵanymyzǵa óte qatty qýanyshtymyn! 12 myńdyq arenaǵa 15 myń adamnyń kelýi, qansha adamnyń dalada kire almaı qalǵany munyń bári qazaqstandyqtardyń sportqa, boksqa degen qyzyǵýshylyǵynyń dáleli.
- Qanat siz osy ýaqytqa deıin 12 raýndtyq jekpe-jek ótkizip kórmedińiz. Qarsylasyńyz da osal boksshy emes. Kórdik. 12 raýnd boıy joıqyn soqqyńyzǵa shydaǵan eń alǵashqy myqty qarsylas osy. Degenmen, kópshilik sizden nokaýt kútti. Qulata almaǵanyńyzdyń basty sebebi nede?
- Boksta bir soqqymen de júzdegen soqqy uryp ta jeńiske jetýge bolady. Bul sondaı qyzyq ári qıyn sport. Men bul jekpe-jekte 12 raýndqa daıyndaldym. Óıtkeni meniń qarsylasymnyń nokaýtynyń ózi men ótkizgen jekpe-jekten kóp. Ózderińiz kórdińizder, bar kúsh-jigerimdi saldym. Reti kelse qulatýdy da oıladym. Biraq qarsylasymnyń taktıkasy qashyp júrip bokstaý boldy. Ondaı qarsylastardy jyldam qulatý ońaı emes. Bul jekpe-jek maǵan úlken tájirıbe boldy. Endi men barlyq qarsylasyma daıynmyn.
- Siz «WBA fedelatin» belbeýińizdi qorǵap, «WBO intercontinental» men «UBC» tujyrymy boıynsha álem chempıony ataǵy úshin judyryqtastyńyz. Biz biletin aqparat osy. Biraq, jekpe-jekten soń WBA ókilderi jekpe-jekti esepke almapty. Sebebin áli eshkim ashyp aıtqan joq. Promoýterińiz Nelson Lopes ta áli resmı habarlamady. Osy oqıǵaǵa baılanysty siz ne aıta alasyz?
- Bul bizdegi boks jankúıerleriniń deńgeıiniń óskendigi. Kásipqoı boksqa degen qyzyǵýshylyq artqanynyń belgisi. Osy jarysyma WBA – diń jaýapty adamy keldi. Salmaq ólsheýde belbeýdi ózi ustap turdy, jeńgen kezimde rıngke shyǵyp belime taqty. «WBA fedelatin» men úshin baǵynǵan beles. Men onyń chempıonymyn. Birneshe ret qorǵadym. Tipti 90 kúnniń ishinde kim meni jekpe-jekke shaqyrady eken dep te kúttim. Eshkim shaqyrmady. Bul belbeýdi súıretip júre bergim kelmeıdi. Bul belbeý kelesi bıikke kóterilý úshin baspaldaq qana. Negizgi maqsat úshin jumys jasaý kerekpiz.
Meniń maqsatym álem chempıony bolý. Sol úshin ter tógip júrmin. Álem chempıony kim? Lara, Kotto, Kanelo. Meniń bokspen aınalysqan ýaqytym olardan artyq bolmasa kem emes. Qazir kez-kelgenimen judyryqtasýǵa daıynmyn. Osy oraıda aıta ketkim keledi, WBA-diń belbeýi úshin alańdap, reıtıń saıtta nege kórsetilmegen dep ýaıymdaǵan jankúıerlerime, jýrnalıserge, kásipqoı boks federasıasynyń vıse-prezıdenti Vıktor Demánenko myrzaǵa alǵysym sheksiz. Osyndaı janashyrlarymnyń bary maǵan erekshe kúsh beredi.
- Kelesi jekpe-jektiń de aýyly alys emes shyǵar. Qaı aıǵa josparlap otyrsyzdar? Tıtýldyq kezdesý bolady ma?
- Bizge turyp qalýǵa, kóp kútýge bolmaıdy. Chempıondyq ataq úshin bolmasa da maǵan qazir jekpe-jek qajet. Sol ataqqa birtaban jaqyndaı berý kerek. Osy ýaqytqa deıin birneshe ret Laraǵa jekpe-jekke shyǵýǵa usynys tastadyq. Bas tartty. Eger men reıtıńte joǵarylasam, oǵan bas tartýǵa múmkindik bolmaı qalady. Sol úshin kóbirek jekpe-jek ótkizip, reıtıńte joǵarylaý kerek. Tek WBA emes, barlyq tujyrym boıynsha chempıon bolý kerekpin. Bul meniń maqsatym.
- «Ekspo-2017» halyqaralyq kórmesi qarsańynda Qanat Islam Qazaqstanda taǵy bir jekpe-jek ótkizedi degendi estidik. Kelisimsharttar jasaldy ma?
- «Ekspo» kórmesi elimiz úshin úlken múmkindik. Kórmege kelgen júzmyńdaǵan týrıserge Qazaqstandy tanystyryp, tarıhı jerlerdi aralatyp qandaı el ekenimizdi kórsetý kerekpiz. Mádenıet jáne sport mınıstri Arystanbek Muhamedıuly jarystan soń qabyldap, Elbasynyń sálemin jetkizdi. Jekpe-jegimdi kórip, jankúıer bolǵanyn aıtty. Mınıstr Ekspo kórmesi kezinde jekpe-jek ótkizý týraly usynys bildirdi. Árıne men qarsy emespin jáne qýana qabyldaıtynymdy aıttym. Kelgen týrıserge Qazaqstandaǵy sporttyń deńgeıin kórsetýge barynsha atsalysý azamattyq paryzym. Jaqyn kúnderi kelissózder aıaqtalyp qalady.
