Tájikstan azamattary jambyldyq polıseılerden jábir kórgenderin aıtýda. Sózderine sensek, Máskeýden úsh júk kóligimen kele jatqan júrgizýshilerdi qazaqstandyq tártip saqshylary qorqytyp, 250 myń reseı rúblin tartyp alǵan. Tonalǵandar dereý aryz jazyp úlgergen soń osy iske qatysy bar degen kúdikpen eki ınspektor men taǵy bir jergilikti turǵyn ustalyp otyr. Qazir osy iske qatysty sotqa deıingi tergeý júrgizilýde.
Bul týraly Ktk arnasy habarlaıdy.
Qarashanyń biri kúni Qyrǵyzstan asý úshin Reseıden kele jatqan úsh júk kóligin Jambyl oblysynyń aýmaǵynda tártip saqshylary toqtatady. Olar jónderine jiberý jáne shekaraǵa jol silteý úshin aqsha surapty. Para berip qutylǵandar polısıa jol silteýimen júrip, tún jarymda tuıyq jolǵa tireledi. Artynsha sol jerge memlekettik nómiri joq jeńil kólikpen alty jigit jetip kelgen. Jábirlenýshilerdiń aıtýynsha, forma kıgen ekeýi ózderin polıseımiz dep tanystyryp, qyzmettik kýáligin kórsetken. Qýǵynshylar sol jerde sheteldikterge bas salyp, tonap ketipti.
Samad Nurmahamadı, Tájikstan azamaty:
-Biz aqshany qaldyryp ketýin surap jalyndyq, tyńdamady. Bizdiń barymyz osy, úıde bala-shaǵa kútip jatyr, qalaı jetemiz dep jylarman boldyq. Ol senderdiń sharýalaryń dep jaýap qatty. Arasynda 50 myńdaı teńge bar edi sony qaldyryp, orys aqshasyn túgel alyp ketti. Sóıtip, sońymyzdan erińder dedi. Biz sońǵy kólikti keri burǵansha olar joq, ketip qalypty.
Jábirlenýshiler jolda toqtatqan polıseıler men artynan qýyp kelgenderdiń sybaılas ekenderine senimdi. Sondyqtan qaqpanǵa aldap túsirgenderge qatysty aryz jazǵan. Bul aqparatty oblystyq ishki ister departamenti de rastap otyr. Qazir osy derekke qatysy bar degen úsh kúdikti ustalyp, sotqa deıingi tergeý júrgizilýde.
-Osy qylmystyq iske qatysy bar degen kúdikpen eki jol patrúldik polısıa ınspektory, sondaı-aq, taǵy bir jergilikti turǵyn tergeý abaqtysyna jabyldy. Qazir bul qylmystyq iske qatysy bar bolýy múmkin ózge de azamattar izdestirilip jatyr. Al Tájikstan azamattary óz elderine qaıtý úshin Qyrǵyzstanǵa qaraı shyǵyp ketti.
Aıta keteıik, tájikterdiń 5 myń rýblin qaǵyp alǵan jol saqshylary shý shyǵa bastaǵan soń ózderine sol aqshany qaıtap beripti. Biraq bul týraly eshkimge tis jarmaýyn ótingen. Jábirlenýshiler shekara asyp, úılerine ketkenimen, 250 myń rúblderin qaıtara aldy ma, joq pa, ol jaǵyn tergeý anyqtamaq. Al tájikstandyq aqparat quraldary jambyldyq tártip saqshylarynyń ashkózdigi týraly jarysa jazyp jatyr.
