Sot Arystanbek Muhamedıulynyń aryzyn qaramastan qaıtardy, - dep habarlaıdy Tengrinews.kz tilshisi mádenıet jáne sport mınıstriniń advokaty Eskendir Álimbaevqa silteme jasap.
"Aryz prosesýaldyq sıpaty jetkiliksiz bolǵandyqtan qaıtaryldy. Qazirgi ýaqytta biz sot siltegen mindetterdi oryndaýmen shuǵyldanyp jatyrmyz" - dedi advokat Eskendir Álimbaev.
Eske salaıyq, Osyǵan deıin T. Júrgenov atyndaǵy Qazaq ulttyq óner akademıasynyń burynǵy stýdenti Eńlik Sydyqova mınıstrdi bóten oımen tıisti dep aıyptaǵan bolatyn. Vıdeoda qyz 2011 jyly Muhamedıuly rektor bolǵanda akademıaǵa aqshaǵa túsirip beretinin aıtty jáne ekiushty usynystar aıtty dep málimdeıdi. Al Muhamedıuly óz kezeginde bul málimdemeniń shyndyqqa janaspaıtynyn málimdegen. Osydan keıin BAQ-tarda taǵy bir qyzdyń mınıstri "tıisti" dep aıyptaǵany jaıly habar tarady. Al keıin QR mádenıet jáne sport mınıstri Arystanbek Muhamedıuly ar-namysy men abyroıyn sotta qorǵaıtyn bolatyny habarlandy.
Osyǵan deıin, mádenıet jáne sport mınıstriniń advokaty Eskendir Álimbaev mınıstrdiń bergen aryzy zań talaptaryna saı toltyrylǵanyn aıtqan bolatyn.
"Memlekettik qyzmetkerge kópshilik aldynda para aldy dep aıǵaqsyz aıyptaýlar taǵylǵan jaǵdaıda, sol kúnnen bastap bir aı ishinde sol aıyptaryn joqqa shyǵarý tıis. Mundaı aıyptaýlar Eńilik Sydyqovanyń sózinde bar", - dedi mınıstrdiń advokaty.
Muhamedıulynyń advokaty eger Eńilik Sydyqova óz aıyptaýlaryn joqqa shyǵaratyn bolsa óziniń aryzyn qaıtaryp alatynyn málimdegen.
"Ondaı óshpendilik oı joq. Biz onyń bul jaǵdaıda qurban bolyp otyrǵanyn bilip otyrmyz, sebebi onyń sózinde jattandy mátinder bar. Iaǵnı ol ne oılaǵanyn aıtqysy kelip turǵan joq, daıyndalǵan mátindi jatqa aıtyp tur. Múmkin oǵan bireý áser etken shyǵar, múmkin odan osyndaı dep aıtýydy ótingen bolar", - dedi advokat Tengrinews.kz tilshisine bergen suhbatynda.
