Ulttyq kompanıalar men memlekettiń ıeligindegi xoldıngter jańajyldyq korporatıvterden bas tartýda. Bul týraly "QazAqparat" tilshisimen bolǵan áńgimede Orda FM arnasyndaǵy "Lıga Jentlmenov" shoýynyń radıojúrgizýshisi, tanymal shoýmen, "1show.kz" event kompanıasynyń prezıdenti Azamat Imashev málim etti.
Onyń aıtýynsha, qazir memleket úshin qıyn tusta, otandyq kompanıalar jańajyldyq saýyq-saıranǵa emes, elimizdiń egemendigine 25 jyl tolýyna arnalǵan túrli sharalarǵa kóp mán berýde. "Samuryq-Qazyna", "Qazaqstan Temir Joly", "QazMunaıGaz" kompanıalaryna xabarlasqanymyzda, olar kompanıa búdjetinen jańajyldyq korporatıvterdi ótkizýge qarajat qarastyrylmaǵanyn xabarlady. "Qazaqstandyq kompanıalar qazir jańajyldyq korporatıvterge múldem daıyndalyp jatqan joq. Kompanıalardyń belsendiligi óte tómen, sebebi bıyl Qazaqstan óz Táýelsizdiginiń 25 jyldyǵyn atap ótedi. Korporatıvterge tapsyrys berý, ártisterdi tańdaý, merekeniń tujyrymdamasyn daıyndaý jeltoqsanda bastalýy yqtımal. Biraq onyń ózi kúmándi. Bizdiń el úshin 16 jeltoqsan óte mańyzdy data bolǵandyqtan, Astanada, aımaqtarda eshqandaı jańajyldyq daıyndyqtar baıqalyp jatqan joq. El egemendiginiń 25 jyldyǵy qalaı aıtsaq ta, barlyǵymyz úshin de óte eleýli oqıǵa", - deıdi Azamat. Al memlekettik emes, derbes shaǵyn kompanıalar, jeke bıznes jańajyldyq korporatıvter úshin meıramxanalardaǵy bos oryndarǵa osy bastan tapsyrys berýde. "Jeke kompanıalar ujymy qazirden qamdanyp jatyr. 23-24 jeltoqsan kúnderi erekshe suranysqa ıe. Restorandardyń basym bóligi oryndaryn satyp úlgerdi. Bul jeke menshik kompanıalar ǵana ekenin atap ótkim keledi", - dep atap ótti tanymal shoýmen.
Degenmen olardyń ózi daǵdarys kezinde kóp shyǵynǵa batpaı-aq, meıramdy arzanǵa ótkizýge tyrysady eken. "Jańa jyldyq korporatıvti ótkizý shamamen 300 myń teńgeden bastalady. Qazir ártisteri shaqyrý da azaıdy. Burynǵydaı meıramdy belgili bir taqyrypqa arnap, Gollıvýd mánerinde uıymdastyrý ózekti emes. Bıyl jeltoqsanǵa ártis jaldaǵan kompanıalar múldem joq. Ár kompanıada ózderiniń talanttary bar. Bólim qyzmetkerleri jeke-jeke senarı daıyndap, biri án aıtsa, ekinshisi mýzykalyq aspaptarda oınaıdy, endi kelesileri kúlkili qoıylym uıymdastyrady", - dep túıdi sózin Azamat Imashev. Keı kezderi ujym Aıaz Ata men Aqshaqardy shaqyrtýdyń ornyna, bólim bastyǵyn Aıaz Ata, al onyń kómekshisin Aqshaqar qylyp kıindirip shyǵarýdy jón kóredi eken. Bul kompanıa qarajatyn únemdep qana qoımaı, áriptesterdiń kóńilin kóteredi.
