Otyn-sý alýǵa aqshasy joq Qyzylorda oblysynyń turǵyny qara sýyqtan qorǵanýdyń tyń tásilin tapty. Josaly kentinde turatyn Serikbaı Ahmetov qysta qatyp qalmaý úshin jertólege jasyrynbaqshy. Sebebi, 70 jastaǵy qarıanyń úıin jylytatyn otyn-kómiri joq. Sondyqtan baspanasynyń ishinen jer qazyp, qys boıy sol jerde kúneltpekshi.
Bul týraly Ktk arnasy habarlaıdy.
Qara sýyqta qatyp qalmaýdyń qamyna kirisken qarıa bir aptadan beri úı ishinen jertóle qazyp jatyr. Óıtkeni Serikbaı Ahmetovtiń qysta jaǵatyn otyny joq. Jalǵyzbasty aqsaqal alatyn zeınetaqym azyq-túlikten artylmaıdy deıdi. Sondyqtan ekinshi toptaǵy múgedek úskirik aıazda jer astyna tyǵylyp jan saqtamaqshy.
Serikbaı Ahmetov, Josaly kentiniń turǵyny:
-Jaǵatyn eshteńem joq. Jerdiń astyna kirip jyly jerde, jerdiń astynda ómir súremin. Ne isteımin endi?
Qazir qarıa jertóleniń jartysyn qazyp qoıypty. Alaıda qysta jyly jatý úshin áli de tereńdetý kerek deıdi.
Serikbaı Ahmetov, Josaly kentiniń turǵyny:
-Eki metr qazam. Boıym 1,68sm. Sosyn astyna jaman kórpelerim bar sony tósep, ústime jaman kórpelerdi jamylyp jatamyn.
Týǵan-týysy da bala-shaǵasy da joq qarıa tek kórshilerimen aralasady eken. Olar da Serikbaı Ahmetovtiń bul qadamǵa amalsyzdan baryp otyrǵanyn aıtady.
Rahıma Oraqova, Josaly kentiniń turǵyny
-Anda-sanda kelip ketedi. Myna úıden sý alyp ketedi. Eshqandaı jamandyǵyn kórgen joqpyz .
Jer astynan jylylyq izdegen aqsaqal atqaminerlerdiń de aldyna talaı barǵan eken. Alaıda eshkim kómek qolyn sozbapty. Sondyqtan byltyrǵy qysta úıiniń edenderin otqa jaǵyp aman shyqqan.
