Bizderdiń biletinimizden bilmeıtinimiz kóp. Sol sebepti jartykesh bilgenimizben jer-álemdi jaryp keterdeı daýryǵatynymyzdy qaıtersiń?! Máselen, Baýyrjan Momyshuly men Fıdel Kastro qarym-qatynasy jaıly kóp aıtylyp-jazylady.
Alaıda, Fıdel Kastro Baýyrjan Momyshulymen qatar ómir boıyna jaqsy kórip, ómir boıyna ózin qaryzdar sezinip kele jatqan qazaqtyń jáne bir batyr perzenti bar ekenin búgingi tańda eshkim de bilmeıdi, biletin az qaýymnyń ózi ol jaıynda tis jaryp aıta almaıdy. Ol dara tulǵa - Tursynhan Musaqanov! Iá, dál taptyńyz, Almaty oblysynyń ákimi bolǵan, qazirde senator Ańsar Musaqanovtyń ákesi, uzyn boıly, taý tulǵaly, kóp sóılemeıtin, kópshilik jıyndarǵa betaldy bara bermeıtin, qaratory susty kelbetti birtoǵa jan Tursynhan aǵamyz.
Keńes Odaǵy men AQSH arasy qatty ýshyǵyp turǵan sátte qupıa qyzmettiń ortalyq shtabynda basshylyq qyzmet atqarǵan Janat Atanyń aıtýynsha, Tursynxan Fıdeldiń jeke oqqaǵary bolyp belgilenip, Kýba tóńkerisi kezderinde jalyndy kósemniń qasynan bir eli de qalmaǵan. Sondaı qarbalas zamanda Fıdelge qastandyq jasalǵanda Tursynhan óz keýdesin tosyp ony ajaldan aman alyp alady. Ý jebe-ıne Tursynhannyń keýdesine kıgen saýytty tesip ótip, denesine bolmashy ǵana zaqym keltiredi. Alaıda asa kúshti ý oqqaǵardy esten tandyryp jiberedi. Saýytty dereý sheship úlgergen qatarlastary Tursynhannyń ómiri úshin kúresip jatqanda Fıdel ómiri sheshpeıtin áskerı kúrteshesin dereý sheship jiberip, qazaq batyrynyń ústine japqan eken. Egerde, Tursynhan eski mámlúkterdeı janyn pıda etip shalt qımyldamaǵanda, Kýba tóńkerisi Fıdelsiz múldem sónip qalar ma edi, al Kýba tóńkerisi bolmasa AQSH aıqyn basymdylyqqa ıe bolyp, adamzat tarıhy basqasha baǵytta damý qarqynyna dýshar bolar ma edi?! Eske alatyn, bilmegenimizdi túgendeıtin, táýba men shúkirge kóp júginetin tarıhı sabaqtarymyz mol aý, sirá?!
