Búgin Ordabasy aýdanynda «Altyn kúz» merekesi saltanatty túrde atalyp ótti. Merekede aýyl sharýashylyq ónimderiniń jármeńkesi men  sharýashylyq tehnıkasy jáne asyl tuqymdy mal kórmesin uıymdastyrdy. Sharaǵa qatysqan aýdan ákimi A.Mamytbekov barsha aýyl sharýashylyq salasynyń mamandaryn merekemen quttyqtap, óz eńbekterimen joǵary kórsetkishterge ıe bolǵan aýdan eńbekkerlerin marapattady.

Jeri shuraıly, azamattary eńbeksúıgish, yntymaǵy men birligi jarasqan Ordabasy óńiri Táýelsizdigimizdiń 25 jylynda turaqty damý jolyna túsip, elimizdiń ilgeri basýyna ózindik úlesin qosyp keledi. 

1995 jyly Ońtústik Qazaqstan oblysy boıynsha barlyq aýylsharýashylyq qurylymynyń sany 8275-ti qurasa, onyń 158-i ıaǵnı 1,9 paıyzy ǵana osy aýmaqtan bolatyn. 21 jylda bul kórsetkish oblysta 72 417-ge jetse, búginde ordabasylyqtardyń úlesi 5505-ke turaqtady. 

Bul jalpy oblystaǵy aýylsharýashylyq qurylymnyń 7,6 paıyzyn quraıdy. Jalpy, Ordabasy aýdany bıylǵy jyldy da aýyl sharýashylyq ónimderi boıynsha jaqsy kórsetkishtermen aıaqtady deýge negiz bar.

Atap aıtsaq: «Sybaǵa» baǵdarlamasyn júzege asyrý boıynsha oblys kórsetkishi 20 173 iri qara maldy qurasa, onyń 5,2 paıyzdyq úlesi Ordabasyǵa tıesili, al «Altyn Asyq» baǵdarlamasymen 2903 ýaq mal alyndy. Bul oblystyq kórsetkishtiń 9,2 paıyzy. «Qulan» baǵdarlamasymen alynǵan 741 asyl tuqymdy jylqynyń oblystaǵy úlesi 16,5 paıyzdy qurady.