Ońtústik Qazaqstan oblysy, Ordabasy aýdanynda aýyldardyń ereksheligi eskerilip, ónimdilikti arttyrý boıynsha atqarylǵan jumystyń nátıjesinde 5 aýylsharýashylyq óndiristik kooperatıv quryldy.
Bıylǵy jyly aýyl sharýashylyǵy daqyldarynyń egistik alqaby 357 gektarǵa artyp, 54 357 gektardy qurady. Ótken jylmen salystyrǵanda maqtanyń egistigi – 62 paıyzǵa, bıdaıdyń egistigi – 32 paıyzǵa, kartoptyń – 3,7 paıyzǵa ulǵaıdy. Aýdanda bıyl 30 259 tonna bıdaı, 15 028 tonna maqta, 68 650 tonna kókónis, 43 500 tonna baqsha ónimderi jınaldy.
Aýyldardyń ereksheligi eskerilip, ónimdilikti arttyrý boıynsha atqarylǵan jumystyń nátıjesinde 5 aýylsharýashylyq óndiristik kooperatıv quryldy. Endigi kezekte, aýyldyq okrýgterde MTS ashý josparlanýda. Bıyl aýdanda 500 gektar jańadan jemis baýlary egilse, onyń ishinde, qarqyndy baý jobasy 97 gektarǵa iske asyryldy. Al Tórtkól, Bógen, Jeńis jáne Qaraqum aýyl okrýgterinde maqta egisin 9000 gektarǵa jetkizý josparlanyp otyr.
Osy oraıda, sýarmaly jerlerdiń jaǵdaıyn jaqsartý jáne jańadan sýarmaly jerlerdi aınalymǵa qosý úshin taǵy 187 tik drenajdy iske qosýǵa jumys jasalmaq. Bıyl aýdan boıynsha jylyjaılardyń kólemi 7,18 gektarǵa ulǵaıǵany da – úlken jetistik.
Aıta keteıik, «Sybaǵa» baǵdarlamasyn júzege asyrý boıynsha oblys kórsetkishi 20 173 iri qara maldy qurasa, onyń 5,2 paıyzdyq úlesi Ordabasyǵa tıesili, al «Altyn Asyq» baǵdarlamasymen 2903 ýaq mal alyndy. Bul oblystyq kórsetkishtiń 9,2 paıyzy. «Qulan» baǵdarlamasymen alynǵan 741 asyl tuqymdy jylqynyń oblystaǵy úlesi 16,5 paıyzdy qurady.
