Bıyl Sozaq aýdany ákimdigi aýyl sharýashylyǵy bóliminiń tarapynan atqarylǵan mal etin eksportqa shyǵarý jónindegi jumystar oń nátıjesin berýde. Alǵa qoıǵan maqsattar men mindetter sátti oryndalyp, shetelde suranystyń artýy atqarylǵan jumystyń jemisti nátıjesi. Tamyz jáne qazan aıynyń birinshi onkúndigi aralyǵynda «Qaraqur» óndiristik kooperatıvinde ósirilgen 2688 erkek qarakól toqtysy Birikken Arab Ámirlikterine eksportqa shyǵarý úshin satyldy. Bul jóninde «Dısada» JSHS-niń dırektory Sanat Súleımanov «Biz bul joly ýaq maldyń tólderin eksportqa shyǵaryp otyrmyz. Aldaǵy kezeńde arab memleketterine eksportqa aýdan agroqurylymdarynan ýaq maldarmen birge sıyr, túıe etin shyǵarý isin júıeli túrde jalǵastyratyn bolamyz. Qazirgi tańda Birikken Arab Ámirlikterine 50 myń ýaq mal tólin satý jóninde kelisimshartymyz bar. Eksportqa bul joly tirideı mal tólderin shyǵardyq.

Keleshekte Sozaq aýdanynyń Taýkent kentinde ornalasqan «Taýkent mal soıý sehyn» kúrdeli jóndeýden ótkizip, iske qosý josparymyzda bar. Ony iske qossaq, muzdatylǵan etti de eksportqa shyǵara alamyz» dedi. Mine, osylaısha sozaqtyqtar asa zor maqtanyshpen mal ósirý óndirisin halyqaralyq deńgeıde jańartqanyn aıtyp, aldaǵy josparlarymen bólisýde.

Sozaq aýdany ákimdiginiń baspasóz qyzmeti.