El ekonomıkasyndaǵy qozǵaýshy kúshterdiń biri kásipkerlik ekendigi belgili. Bul rette aımaqtyń ekonomıkasynyń damýyna arystyq kásipkerler ózderiniń qomaqty úlesterin qosyp keledi. Bul týraly Arys qalasy ákiminiń baspasóz qyzmeti habarlap otyr. 

Osy oraıda Arys qalasynyń ákimi M.Qadyrbek «Bıznestiń jol kartasy-2020» jáne «Jumyspen qamtý-2020» memlekettik baǵdarlamalarynyń qalamyzda iske asý barysymen tanysý maqsatynda qalamyzdaǵy birqatar kásipkerlerdiń jumys oryndarynda bolyp, shyǵarylatyn ónimniń sapasy men ondaǵy jumysshylardyń jaǵdaıymen tanysty. Atap aıtqanda, «Arysshpalzavody» jaýapkershiligi shekteýli seriktestigi táýligine 70 vagonǵa deıin tehnıkalyq qyzmet kórsetedi, «Araı» ÓK aıaq kıim shyǵaratyn seh, táýligine 30 par aıaq kıim tigip shyǵarady, «JK A.Artykova» jáne «JK T.Pernebaeva» kıim sheberhanalary tapsyrysqa sáıkes, ár túrli sanattaǵy kıimder tigýmen aınalyssa, «JK B.Sarbasovtyń» dıirmeni táýligine 120 tonna bıdaı óńdep, un shyǵaryp Qazaqstannyń barlyq oblystarymen qatar Aýǵanstan, Tájikstan Respýblıkalaryna eksporttaıdy. Dıirmen keshenindegi naýbaıhana táýligine 3500-4000 dana bólke nan shyǵaryp, óńirimizdegi eń arzan nan 35 teńgeden halyq ıgiligine usynýda.

Kásipkerlik nysandardyń tynys-tirshiligimen tanysqan shahar basshysy M.Qadyrbek kásipkerlerdiń iskerligine alǵysyn bildirip, jumystaryna sáttilik tiledi.

Arys qalasy ákiminiń baspasóz qyzmeti