Keshe Shymkent qalasyndaǵy «Túrkistan» saraıynda Ońtústik Qazaqstan oblysy aýyl sharýashylyǵy qyzmetkerleriniń dástúrli «Altyn kúz – 2016» merekesine arnalǵan saltanatty is-shara ótti. Merekelik jıynǵa kelgen qonaqtarǵa aldymen aýyl sharýashylyǵy salasynda jetken jetistikterdi baıandaıtyn beınerolık kórsetildi. Onda oblys dıqandary men sharýalary 2016 jyldy tabysty qorytyndylaǵany, agrosektor salasyn damytý úshin keleshekte atqarylatyn tirlikter jaıynda aıtyldy. Sonyń ishinde agroónerkásip keshenin qarqyndy damytý maqsatynda 2017–2020 jyldarǵa arnalǵan strategıalyq 6 baǵyttyń aıqyndalǵany jóninde baıandaldy.
Aýyl sharýashylyǵy eńbekkerlerin dástúrli «Altyn kúz» merekelerimen quttyqtaǵan oblys ákimi bul salada kóptegen ońdy isterdiń tyndyrylǵanyn maqtanyshpen aıtyp ótti.
– Bul Táýelsizdiktiń 25 jyldyǵy qarsańynda uıymdastyrylǵan saltanatty shara boldy. Osyǵan oraı, barshańyzdy aldaǵy ulyq merekemen quttyqtaımyn. Ońtústik óńirinde aýyl sharýashylyǵy árdaıym basym sala bolyp sanalǵan. Óıtkeni, biz ózge oblystardaı qazba baılyqtarǵa, ken oryndaryna baı emespiz. Ras, tek ýran ǵana óndiriledi. Sondyqtan agroónerkásip keshenin órkendetý biz úshin birinshi kezekte turǵan másele. Aýyl sharýashylyǵy salasynda jyldan-jylǵa jaǵdaı jaqsaryp keledi. Máselen, byltyrǵy jylmen salystyrǵanda bıyl egistik kólemi 13 myń gektarǵa artty. Baqsha, kókónis, maqta, kartop, jemis-jıdekten mol ónim jınaldy. Buǵan sharýashylyqtardyń agrotehnologıalyq sharalardy durys júrgizýiniń, ónim óndirýde ozyq tehnologıalardy qoldanýdyń nátıjesinde qol jetkizildi. Topyraqty tereń qopsytý tehnologıasy, tamshylatyp sýarý ádisi, jylyjaı kólemi boıynsha respýblıkada aldyńǵy orynda kelemiz, – dedi Janseıit Qanseıituly.
Sonymen birge, oblys ákimi baıandamasynda aýyl sharýashylyǵy salasynda oryn alǵan joǵary kórsetkishter jeńildetilgen janar-jaǵarmaı, tyńaıtqyshtarmen qamtamasyz etý, asyl tuqymdy mal sharýashylyǵyn qoldaý, ınvestısıalyq sýbsıdıa, kredıttik, lızıńtik ústemeaqyny sýbsıdıalaý baǵdarlamasy sekildi memlekettik qoldaýlardyń arqasynda múmkin bolǵanyn jetkizdi. Óńir basshysy óz sózinde keler jyly Tólebı, Túlkibas aýdandarynda qarqyndy baý kólemin ulǵaıtý kerektigin, mal, tuqym sharýashylyqtaryn damytý baǵytynda tıisti jumystar qolǵa alynatynyn atap ótti.
Shara barysynda oblys ákimi aýyl sharýashylyǵy salasynda ónim óndirýden joǵary nátıje kórsetken aýdan, qalalardy arnaıy syılyqpen marapattady. Astyq óndirýden – Qazyǵurt, maqsarydan – Tólebı, maqta jınaýdan – Maqtaaral, baqshalyq daqyldardy ósirýden – Shardara, kókónisten – Saryaǵash, jemis-jıdek jınaýdan – Túlkibas aýdandary, sút óndirýden Arys qalasy, et óndirýden Ordabasy aýdany, «Sybaǵa» baǵdarlamasyn oryndaýdan Túrkistan qalasy, «Altyn asyq» baǵdarlamasy boıynsha Báıdibek aýdany jáne ozyq ınvestısıalyq jobalardy júzege asyrýdan Shymkent qalasy birinshi orynǵa laıyq dep tanyldy.
Óz kezeginde aýyl sharýashylyǵy salasynda ter tógip júrgen eńbek ozattarynyń da attary atalyp, arnaıy syılyqtarǵa ıe boldy. Sondaı-aq, aýyl sharýashylyǵy taqyrybynda qalam terbegen, salanyń jetistikterin halyqqa nasıhattaýshy BAQ ókilderi de marapattaldy. Olardyń qatarynda bizdiń gazettiń qyzmetkeri Ánýar Jumashbaev ta boldy.
Á.NURJIGITULY, «Ońtústik Qazaqstan» gazeti
