Almaty qalasynyń ákimi Baýyrjan Baıbek búgin jurnaǵy da joq júıege tıesili meıram — 9-mamyrdy dúrkiretip ótkizýge bar kúshin salyp, al ult-azattyq kóterilistiń 100 jyldyǵy syndy qaıta jańǵyrǵan qazaqtyń tarıhı oqıǵasyn atap ótýge nege qulyqsyz?..
Almaty qalasynyń ákimi Baýyrjan Baıbek pen onyń ishki saıasat boıynsha orynbasary Arman Qyryqbaevty osy máselege basty nazar aýdarýǵa shaqyrǵan qoǵam qaıratkeri Muhtar Taıjan ortaǵa usynys tastady.
Óz usynysy týraly Muhtar Taıjan Facebook-tegi jeke paraqshasynda jazypty dep habarlaıdy kaz.365info.kz saıty.
«Árıne, aryqtardy tazalaý kerek, selden qorǵaný úshin bekinis ornatý qajet, qalamyz ádemi bolý úshin baqtarǵa qoqys jáshigin qoıyp, tazalaq júrgizý kerek. Munyń bárin kórip júrmiz, durys qoı, túsinemiz. Túrli mádenı sharalar ótkiziledi. Ádil bolý úshin atqaryp jatqan osy isterińizge toqtala ketýdi jón kórdim.
Alaıda basqa da mańyzdy máseleler bar ǵoı…
Mysaly, sizder qalada 2-3 jylda arakidik bir aksıa ótkizesizder. 9-mamyrdan basqasyn.
Al 9-mamyrda jylda áskerı kıimdegi adamdar kóshede marshqa shyǵady, mıllıondaǵan qazaqty qyrǵan qyzyl ımperıanyń shen-shekpenin taqqandar ortamyzda júredi, keńinen nasıhattalady.
Qyzyldyń zamanynda Aralymyzdan aıyryldyq, 7 úlken synaq alańynda atom jáne geptıl bombalary synalyp, bizdiń jerimizdiń tý talaqaıy shyqty. Qazaq mektepteri jabyldy, qazaqtyń zıalylary atyldy. Ony biz umytqanymyz joq. Ondaıdy umytý múmkin emes.
Mine, osyndaı aksıalarǵa muǵalimmen oqýshylardy qosaqtap, kýrsanttardy jiberesiz, áskerı orkestr uıymdastyrasyzdar.
Shynyńyzdy aıtyńyzshy, siz mundaı aksıadan qandaı lázzat alasyz? Menińshe, bul — tarıhı stokgolm sındromynyń belgisi.
Siz shynymen de tarıhty qurmet tutasyz ba?.. Olaı bolsa, 1916 jylǵy ult-azattyq kóterilistiń 100 jyldyǵy qurmetine nege osylaı áskerı sherý ótkizbeımiz? Álıhannyń 150 jyldyǵyna olaı etýge bolmaı ma? Nege balalarǵa tarıhtyń bir jerin ýaǵyzdap, al taǵy bir jeri týraly jasyryp qalasyz.
Dátińiz jetpese, bizge ruqsat berińiz.
Biz ashtan, repressıadan qyrylǵan, Keńes ımperıasy quramynda ekologıa qurbandary bolǵan mıllıondaǵan qazaqtyń arýaǵyn eske alatyn sherýdi ózimiz-aq uıymdastyra alamyz. Tek ruqsat berseńiz, bolǵany…»
Avtor: Kamshat Satıeva
