Aýyl sharýashylyǵy salasy ekonomıkalyq ósimdi qamtamasyz etetin negizgi faktorlardyń birine jatady. Keleshekte jerasty qazba baılyqtary taýsylýy múmkin. Sol kezde memlekettiń negizgi kúnkóris kózi agrosektor salasy bolyp qala beredi. Memleket basshysy Nursultan Nazarbaevtyń júrgizip otyrǵan sarabdal saıasatynyń arqasynda ındýstrıalyq-ınnovasıalyq damýmen qatar aýyl sharýashylyǵy da órkendep keledi. Prezıdent Qazaqstan halqyna arnaǵan dástúrli Joldaýlarynda aýyldyń jaǵdaıyn kóterip, sharýalarǵa beriler kómekti eseleý jóninde Úkimetke jyl saıyn arnaıy tapsyrmalar júktep otyrady.

Sońǵy jyldary Qazaqstan halqynyń ómir súrý deńgeıin anyqtaıtyn asa mańyzdy strategıalyq qyzmet salasy retinde agroónerkásip óndirisiniń tıimdiligin arttyrýǵa eleýli nazar aýdarylýda. Sondyqtan elimizdiń agroónerkásiptik keshenin damytý agrarlyq saıasattyń asa mańyzdy baǵyty bolyp otyr. Agroónerkásiptik keshenniń negizgi mindeti – halyqty azyq-túlikpen, al, ónerkásipti aýyl sharýashylyǵy shıkizatymen qamtamasyz etý. Desek te, ǵylymsyz, jańa tehnologıasyz bul jospardyń naqty júzege asýy ekitalaı. Sol úshin Ońtústik Qazaqstan oblysynyń ákimi Beıbit Atamqulovtyń bastamasymen aýyl sharýashylyǵyn reformalaýdyń 5 jobasy qabyldanyp, sonyń bir baǵyty barlyq aýdan, qalalarda fermerlerge qyzmet kórsetetin ǵylymı-konsýltasıalyq ortalyqtar ashý bolyp otyr

Jýyrda Qazaq ulttyq agrarlyq ýnıversıtetiniń rektory T.Espolov bastaǵan aýyl sharýashylyǵy salasynyń bir top ǵalymy óńirge arnaıy issaparmen kelgen bolatyn. Egistik jerdiń qunarlylyǵyn arttyrý boıynsha ázirlegen pılottyq jobalarymen tanystyrǵan ǵalymdar joǵaryda atalǵan máselege oraı birlesip jumys isteýge daıyn ekendikterin jetkizgen edi

Ánýar JUMASHBAEV, «Ońtústik Qazaqstan» gazeti