Aqtilek Baıbazarov esimdi astanalyq óziniń ınstagram jelidegi paraqshasynda Qazaqstan halqyna jańa bir oı-ıdeıa tastady. Aqtilektiń aıtýynsha elimizde ártúrli jeńildikter, aksıalar kóptep uıymdastyrylady. Mysaly, Jańa jyl, 8 naýryz, Helloýın kezinde dúken aralaǵanda aq merekelik kóńil-kúı seziledi. Belgili bir taýar, ónim alǵanda merekege oraı uıymdastyrylǵan jeńildikke kóziń eriksiz túsedi. Mundaı dúnıeni 1 jeltoqsan ıaǵnı Tuńǵysh Prezıdent kúnine qarsy da uıymdastyrýǵa bolady ǵoı dep jazady astanalyq belsendi.

1 jeltoqsan taıap qaldy. Aqtilek barlyq kásipkerlerdi osy bir sharany qolǵa alyp, ıdeıanyń jan-jaqqa taralýyna sep bolýǵa shaqyrady.

Ideıa bylaısha kórinis tabady: «Sút búgin -10 % nemese kostúmder -20%. 1 jeltoqsan Elbasy qurmetine oraı turmystyq tehnıka úıinde jeńildikter kúni».

Jazba sońynda Aqtilek Elbasynyń memleket úshin atqarǵan qyzmeti, qosqan úlesi zor, sondyqtan oǵan degen qarym-qatynas ta erekshe bolýy tıis dedi.