Aqyn Tumanbaı Moldaǵalıev jaıǵan dastarqan basynda Hamıt Erǵalıev, Ǵafý Qaıyrbekov, Saǵı Jıenbaev bastaǵan bir top aqyndar bolsa kerek. Bir kezde sóz kezegin Ǵafý Qaıyrbekov alady da, yqylas-iltıpatyn ortalaryndaǵy jasy úlken aqyn aǵasy Hamıt Erǵalıevke arnaıdy: «Bir top júırik dalanyń shańyn aspanǵa kóterip, shaýyp kele jatyr, – dep bastaıdy Ǵafý ádettegideı arqalana sóılep, – kóp dúrmektiń aldynda dalanyń aýasyn erkin jutyp aq boz arǵymaq, keledi. Sol arǵymaq Sizsiz, Hama. Men anaý kóp shoǵyrdyń ishindemin».
Hamań bul sózge qatty tolqyp, kózi jasaýrap, ornynan turyp Ǵafýdy qushaqtap, únsiz súıedi.
Sodan, bir mezgilde sóz kezegin Hamıt Erǵalıevtiń ózi alǵanda: «Ǵafý, ras aıtasyń, bir top júırik dalanyń shańyn aspanǵa kóterip shaýyp kele jatyr. Sol dalanyń taza aýasyn erkin jutyp, men aǵyp kele jatqanymda, sońymnan qara úzbeı kele jatqan tory qunannyń demin estımin. Adymymdy keń alyp, sermeı túsemin. Álgi qunan da qalysar emes, maǵan jeter-jetpes jerde kele jatyr. Sol seniń qunanyń, Ǵafýjan!» degen eken.
Keıin arada jyldar ótkende Tumanbaı Hamańa erkelep álgi sózderdi eske alyp, «Hama, sol jylǵy qalyń dúrmektiń ishinen taı mingen Saǵı ekeýmiz kózińizge túsken joqpyz ba?» dep ázildeıdi ǵoı.
Sonda Hamań aqyn inisin bálenbaı jyl ókpeletip aldym ba degendeı kóńilmen qaýqyldap: «Tumash-aý, bar bolǵanda qandaı: sol kóp dúrmektiń ishinde juldyzdaı aǵyp, sýyryla shaýyp kele jatqan qos qońyr – Saǵı ekeýińniń taıyń bolatyn!» degen eken.
http://adebiportal.kz/
Pikir qaldyrý