Túrik prezıdenti Erdoǵan Reseı prezıdenti Pýtınmen telefonda sóılesti, dep habarlaıdy «Qamshy» portaly.
Eki el prezıdenti telefondaǵy áńgimesinde Aleppodaǵy shıelenisti jaǵdaıdy sheshýge jol izdedi.(Aleppo – túrikshe Halep, Sırıanyń iri qalalarynyń biri jáne provınsıa ortalyǵy. Halyq sany úsh mıllıonǵa jaýyq Aleppo Sırıanyń úlken qalalarynyń biri jáne Osmanly ımperıasy kezindegi Konstantınopol men Kaırden keıingi úshinshi úlken qalasy boldy. Túrik bıligi sondyqtan da ondaǵy adam taǵdyryna qatty alańdaýshylyq bildiredi)
Túrik prezıdenti baspasóz qyzmeti taratqan aqparat boıynsha prezıdentter Sırıadaǵy azamattyq soǵys máselesin de talqylady.
Túrik qarýly kúshteri Sırıaǵa kirgen Evfrat qalqany qozǵalysy(Fırat Kalkanı Harekatı) aıasynda, Ál-Bab aımaǵynda júrgizilgen operasıada Túrik áskerlerine qarsy shabýyldar jasalǵan. Sondyqtan da Pýtın men Erdoǵan tize qosyp áreket etip, Aleppodaǵy turǵyndardyń taǵdyryna zardap keltirmeı tynyshtyq ornatý máselesin sóılesti.
Erdoǵan Evfrat qalqany operasıasyn bastap, Sırıaǵa ásker kirgizse de, Sırıanyń terıtorıalyq tutastyǵyna qurmet kórsetetinin basa aıtty.
Sonymen qatar eki lıder orys-túrik qatynasynyń jaqsara túsýi úshin qoldan kelgeniniń bárin jasaıtynyn da keńesken. Bul másele aıasynda Túrik premeri Iyldyrym 6 jeltoqsanda Máskeýge resmı issaparmen barmaq. Ári, ótken jyly ushaq daǵdarysyna oraı kelmeı qalǵan Reseı Federasıasynyń Syrtqy ister mınıstri Sergeı Lavrov ta 1 jeltoqsan kúni Túrkıaǵa barady. Sergeı Lavrov Orys-Túrik ortaq strategıalyq josparlaý tobynyń otyrysyna qatysý maqsatymen Antalıanyń Alanıa aýdanyna barady.
Otyrys orys ushaǵy qulatylǵannan tap bir jyldan keıin birinshi ret uıymdastyrylady. Alanıada eki jaqty qatynastarmen qosa aımaqtyq jáne halyqaralyq taqyryptar da qolǵa alynady. Otyrysta Sırıanyń ahýaly da áńgime bolady dep kútilýde.
Aıta ketsek, búgin Qazaq prezıdenti Nazarbaev ta Pýtınmen telefonda sóılesken bolatyn. Áńgimelesý barysynda Nursultan Nazarbaev pen Vladımır Pýtın ekijaqty yntymaqtastyqtyń jaǵdaıy men perspektıvalaryn talqylaǵan. Memleketter basshylary sondaı-aq óńirlik jáne halyqaralyq kún tártibindegi ózekti máseleler jóninde pikir almasty. Telefon arqyly sóılesýge Reseı jaǵy bastamashy boldy dep habarlaǵan edi Aqordanyń baspasóz qyzmeti.
