Astana qalasynyń ákimi Áset Isekeshev Elorda tórinde ınovasıalyq kongreste Elorda ósý qarqyny boıynsha álemniń birneshe memleketiniń astanalarynan basyp ozǵanyn aıtqan.

«Astana ósý qarqyny boıynsha birneshe eldiń astanalarynan ozyp ketti. Mysaly, Ábý-Dabı, Máskeý, Ankara, Baký, t.b qalalardy aıtýǵa bolady. Toqsanynshy jyldardyń basynda bul qalada 280 myń adam bolǵan. Al qazir 1 mıllıonǵa jetti. İshki jalpy ónim 18 jyldyń ishinde 180 esege ósti. Shaǵyn jáne orta bıznestiń sany 100 myńǵa jetti. Sheteldik týrıserdiń sany 5 myńnan 273 myńǵa deıin artty. Al qonaq úılerdiń sany 163 jetti», – degen Áset Isekeshev.

Aıta keter bolsaq, bıylǵy jyly 21 maýsymda Investısıalar jáne damý mınıstri bolǵan Áset Isekeshev ornyn Jeńis Qasymbekke bosatyp, Astana qalasynyń ákimi bolyp taǵaıyndaldy. Ol ákim bola salyp, eki apta ótkende Astanada halyq sany mıllıonǵa jetti dep jar salǵan bolatyn. Alaıda qoǵamda «Astanada 2016 jyldyń basynda 871 myń 200 turǵyn bolǵany» aıtylyp, jańa ákimge senbestik tanylǵan bolatyn.

Eske salsaq, Isekeshev bir aı ýaqyt buryn ǵana «Qazirgi tańda biz jahandaǵy iri ınovasıalyq Dýbaı, London, Máskeý syndy qalalarmen jáne Nuawei, Makkenzı, t.b. kompanıalarmen tyǵyz baılanys ornattyq. Ondaǵy maqsatymyz – Astanaǵa jańa tehnologıalar tartý. Bul baılanys shetelden ınvestısıa tartýǵa múmkindik beredi. Aldaǵy ýaqytta Astana halyqaralyq qarjy ortalyǵynda brıtanıalyq zań júıesin qoldanatyn bolamyz. Búginde sheteldik ınvestorlarǵa vızalyq rásimderge jáne olardyń jumys isteýine jeńildik jasaımyz. Astanany megapolıske aınaldyramyz», - degen bolatyn.