«Agrobıznes – 2020» baǵdarlamalary maqta salasynyń tıimdiligin arttyrdy. Maqta óndirýshilerge sýbsıdıa bólý, janar-jaǵarmaıdy, tyńaıtqyshtardy, aǵyn sýdy, hımıalyq preparattardy paıdalanýda 40 paıyzdyq jeńildik berý sharýalardyń yntasyn arttyra otyryp, joǵary ónimdi, sapaly maqta óndirýge qol jetkizdik. Astanada ótken agroónerkásip kesheni qyzmetkerleriniń respýblıkalyq keńesinde aýyl sharýashylyǵy ónimderin óndirýde jáne óńdeýde, sonyń ishinde, ońtústiktegi maqta sharýashylyǵynyń joǵary áleýetin ashýda klasterlik júıeni belsendi paıdalanýdyń qajettiligin, osy arqyly toqyma ónerkásibin damytýǵa bolatynyn, maqta óndirý, óńdeý salasynyń keleshegi bar ekenin basa kórsetti. Jańa tásil men ınovasıalyq-ındýstrıaldyq tehnologıa negizinde básekege tótep beretin ónim shyǵarýǵa, aýyl sharýashylyǵy ǵylymyn, onyń ishinde qoldanbaly agrarlyq zertteýlerdi damytýǵa nazar aýdardy.
Elbasy maqta salasyn damytýda alǵa qoıǵan mejelerdi ózi tikeleı baqylaýǵa aldy. Sóıtip, Ońtústik Qazaqstan oblysynda erkin ekonomıkalyq aımaq qurylyp, Qazaqstannyń maqta-toqyma klasteriniń alǵashqy qazyǵy qaǵylǵany belgili. Endi osy istiń jemisin kórip otyrmyz. Óıtkeni, oblysta óndirilgen maqta talshyǵynyń 30 paıyzdan astamy tereń óńdelip, ıaǵnı jip ıiretin, mata toqıtyn, jańa úlgidegi básekege qabiletti daıyn buıymdar óndiretin fabrıkalar iske qosyldy. Myńdaǵan jumys orny ashyldy, al, bul kórsetkish egemendiktiń alǵashqy jyldarynda nebári 3-4 paıyzdan aspaıtyn edi.
Eger oblysta óndirilgen maqta jáne onyń janama ónimderin tereń óńdep, daıyn buıym jasap eksportqa jibersek, 2 mlrd. AQSH dollaryna jýyq tabys tabar edik. Qazirgideı ekonomıkalyq daǵdarys beleń alyp, munaı baǵasy arzandap jatqan ýaqytta maqta salasyn damytyp, ony tereń óńdep, taýarlardy eksportqa shyǵarý elimizdiń ekonomıkasyn birshama damytýǵa oń áserin tıgizeri sózsiz.
Sońǵy jyldary qazaq maqtasy búkil álemdik maqta ósiretin memleketter arasynda ónimdilik boıynsha beıresmı reıtıńte aldyńǵy qatarly oryndardy ıelenip júr. Maqta óndiretin 95 memlekettiń arasynda elimiz 2013 jyly 11-shi orynda bolsa, 2014-2015 jyldary 10-shy orynnan kórindi. Ónimdilik ár gektardan 29,5 sentnerden asty. Oblysta bul kórsetkishti jaqyn arada ár gektardan 35-40 sentnerge jetkizýge tolyq múmkindikter bar. Óıtkeni, maqta óndirý salasynda áli paıdalanylmaı jatqan múmkindikter jáne kedergiler jetkilikti.
Sondyqtan «Agrobıznes-2020» baǵdarlamasy maqta ónerkásibine úlken serpin berdi de aıtýǵa tolyq negiz bar. 2020 jylǵa deıin de atqarylatyn sharýa da maqsattar da jetkilikti. Sondyqtan barlyǵy aldaǵy ýaqyt enshisinde dep bilemin.
Eldos Ahmetaı
